खोज

बुटवल, २५ कात्तिक ।

लुम्बिनी प्रदेशकै प्रतिष्ठित शैक्षिक संस्था न्यू होराइजन इङ्लिस बोर्डिङ स्कूल, बुटवलले आयोजना गर्ने लुम्बिनी प्रदेशस्तरीय हाजिरीजवाफ प्रतियोगिताको ३२औं संस्करण आगामी कात्तिक २८ गतेदेखि सुरु हुने भएको छ । विद्यालयले मंगलबार बुटवलमा पत्रकार सम्मेलन गर्दै प्रतियोगिताको सम्पूर्ण तयारी पूरा भएको जनाएको छ ।

यस वर्षको प्रतियोगिताको पहिलो चरण आउँदो शुक्रबार तीनवटा केन्द्र — रुपन्देहीको बुटवल, दाङको लमही र पाल्पामा एकसाथ सञ्चालन हुनेछ । लुम्बिनी प्रदेशका १२ वटै जिल्लाका विद्यालयहरू यस प्रतियोगितामा सहभागी हुनेछन् ।

सन् २०५० सालमा जिल्लास्तरीय रूपमा सुरु गरिएको यो प्रतियोगिता क्रमशः अञ्चलस्तर हुँदै पछिल्ला तीन वर्षदेखि प्रदेशस्तरीय रूपमा आयोजना हुँदै आएको हो । विद्यालयका अनुसार यो प्रतियोगिता विद्यार्थीको बौद्धिक क्षमताको विकास, ज्ञान–विज्ञानको अभिवृद्धि र सरकारी तथा निजी विद्यालयबीचको सहकार्य सुदृढ गर्न लक्षित गरिएको छ ।

विद्यालय व्यवस्थापन समितिका अध्यक्ष ज्ञानेन्द्र कसजुका अनुसार, कात्तिक २८ गते तीनवटै केन्द्रबाट छनोट हुने छवटा टोलीबीचको फाइनल प्रतियोगिता मंसिर १३ गते बुटवलमा हुनेछ । विद्यालयका प्राचार्य लोकनाथ उपाध्यायका अनुसार, प्रत्येक केन्द्रबाट दुई–दुई टोली — प्रथम र द्वितीय — फाइनलमा प्रतिस्पर्धा गर्ने छन् ।

बुटवल केन्द्रमा रुपन्देही, कपिलवस्तु र नवलपरासी, पाल्पा केन्द्रमा पाल्पा, गुल्मी र अर्घाखाँची, र लमही केन्द्रमा बर्दिया, बाँके, दाङ, पूर्वी रुकुम, रोल्पा र प्युठानका विद्यालयहरू प्रतिस्पर्धामा रहनेछन् ।

प्रतियोगिताको निष्पक्षता कायम राख्न न्यू होराइजन संस्थाअन्तर्गतका विद्यालय र विद्यार्थीलाई प्रत्यक्ष प्रतिस्पर्धाबाट बाहिर राखिएको छ । तर उनीहरूलाई अवलोकनकर्ताका रूपमा सहभागी गराइनेछ, जसले बौद्धिक विकासमा सहयोग पु¥याउने विद्यालयले जनाएको छ ।

फाइनलमा प्रथम हुने विद्यालयले ४० हजार रुपैयाँ नगद, ट्रफी, शिल्ड र प्रमाणपत्र पाउनेछ। द्वितीयले २५ हजार, र तृतीयले २० हजार रुपैयाँ सहित शिल्ड र प्रमाणपत्र प्राप्त गर्नेछन् ।

त्यस्तै, तीनवटै केन्द्रका प्रथम, द्वितीय र तृतीय टोलीले क्रमशः ९ हजार, ६ हजार र ४ हजार ५ सय रुपैयाँ, शिल्ड, मेडल र प्रमाणपत्र पाउनेछन् । अन्य तीन टोलीलाई प्रोत्साहन पुरस्कारस्वरूप १५ सय रुपैयाँका दरले शिल्ड, मेडल र प्रमाणपत्र प्रदान गरिने संयोजक मनोज सिलवालले जानकारी दिए ।

पत्रकार सम्मेलनमा नेपाल पत्रकार महासंघ रुपन्देहीका उपाध्यक्ष विश्वास ढकालले न्यू होराइजन विद्यालयले शैक्षिक गुणस्तर, अतिरिक्त क्रियाकलाप र खेलकुदमा देखाएको अग्रगामी अभ्यास अन्य विद्यालयका लागि पनि प्रेरणादायी भएको बताए ।

कार्यक्रममा विद्यालयका उपप्राचार्य बालकृष्ण भण्डारी, बासुदेव अर्याल र राजिव श्रेष्ठ, पूर्व संयोजक कपिल आचार्य, व्यवस्थापन संकाय संयोजक प्रकाश खनाललगायतको उपस्थित थियो ।

गत वर्षको ३१औं संस्करणमा बुटवलको एभरेष्ट बोर्डिङ स्कूल प्रथम, दाङ तुल्सीपुरको अमर बोर्डिङ स्कूल द्वितीय र पाल्पाको जनता मावि तानसेन तृतीय स्थानमा रहेका थिए ।

सन् २०४६ सालमा स्थापना भएको न्यू होराइजन इङ्लिस बोर्डिङ स्कूलले तीन दशकभन्दा बढी समयदेखि शिक्षा क्षेत्रमा उल्लेखनीय योगदान दिँदै राष्ट्रिय स्तरमै विशिष्ट पहिचान कायम गर्न सफल भएको विद्यालयले जनाएको छ ।