खोज

बुटवल, २९ माघ ।

नेकपा माओवादी केन्द्रका उपाध्यक्ष एवं पूर्वसभामुख कृष्णबहादुर महराले ढिलोचाडो माओवादी घटकहरूबीच एकता हुने दाबी गरेका छन ।

लुम्बिनी प्रदेशको राजधानी राप्ती उपत्यका देउखुरीमा आयोजित प्रेस सेन्टर नेपाल, लुम्बिनी प्रदेशको तेस्रो अधिवेशनलाई सम्बोधन गर्दै महराले माओवादी आन्दोलनलाई सुदृढ बनाउन एकता अपरिहार्य रहेको धारणा व्यक्त गरेका थिए । उनले भने , “ढिलोचाडो माओवादी घटकहरू एक ठाउँमा आउँछन्।

यो अलि ढिलो हुन सक्छ, तर हामी अन्ततः एउटै बिन्दुमा उभिनै पर्छौँ। देशको वर्तमान राजनीति स्थिर छैन। कांग्रेस–एमाले नेतृत्वको सरकार कमजोर अवस्थामा छ, जसले गर्दा माओवादी आन्दोलनप्रति जनताको आकर्षण फेरि बढ्दै गएको छ।” महराले हाल एमाले र कांग्रेस परित्याग गरी माओवादी केन्द्रमा प्रवेश गर्नेहरूको लहर बढिरहेको दाबी गरे।

उनका अनुसार पार्टीको केन्द्रीय समितिको हालै सम्पन्न बैठकले महत्वपूर्ण निर्णयहरू गर्दै संगठनलाई नयाँ मोडमा लैजाने योजना बनाएको छ। उनले भने , “विभाजित मानसिकताबाट ग्रस्त माओवादी घटकहरू एक ठाउँमा उभिन सक्ने हो भने हामी २०६४ सालको राजनीतिक सशक्त अवस्थालाई पुनःस्थापित गर्न सक्छौँ। केन्द्रीय समितिको बैठकले एकताको स्पष्ट सन्देश दिएको छ, र यो प्रक्रिया क्रमशः अघि बढ्दै जानेछ।”

यसैबीच, माओवादी घटकहरूबीच एकताका लागि विभिन्न तहमा छलफलहरू भइरहेका छन्। महराले आन्तरिक बहस र छलफललाई तीव्र पार्दै माओवादी आन्दोलनलाई एकीकृत बनाउने दिशामा नेतृत्व प्रतिबद्ध रहेको संकेत गरेका छन ।