खोज

तिलोत्तमा ।

रुपन्देहीको तिलोत्तमा नगरपालिका वडा नं. ७ भलबारी स्थित तिलोत्तमा होम्स्मा घर बुकिङ्क गरेर भुक्तानी सम्पन्न गरेकाहरुलाई जग्गाधनी प्रमाणपत्र (लालपूर्जा) प्रदान गरेको छ । लु

म्बिनी अष्टदीप मल्टिनेशनल प्रा.लि.ले प्रवद्र्धन गरेको तिलोत्तमा होम्स्मा घर बुकिङ्क गरेकाहरुलाई कम्पनीले सम्झौताअनुसार घरको स्वामित्व हस्तान्तरण गरेको हो । कम्पनीले शनिबार घर बुकिङ्क गरेर भुक्तानी सम्पन्न गरेका चार जनालाई घरको सम्पूर्ण स्वामित्व सहित लालपूर्जा हस्तान्तरण गरेको छ । तिलोत्तमा होम्स्मा बसोबास गरेका १५ घरधनीमध्ये शनिबार चार जनाले लालपूर्जा प्राप्त गरेका हुन् ।

घर निर्माण सम्पन्न भएर हस्तान्तरण गरिएका बाँकी परिवारलाई क्रमशः स्वामित्व हस्तान्तरण गरिने कम्पनीले जनाएको छ । कम्पनीले घर बुकिङ्क गरेर भुक्तानी सम्पन्न गरेकाहरुलाई स्वामित्व हस्तान्तरण गर्ने कार्यलाई प्राथमिकता दिएको अध्यक्ष नेत्रलाल वनले बताए । शनिबार शंकरप्रसाद पौडेल, ऋद्धि शर्मा, विजेता पिया र युवराज गिरीलाई घरको स्वामित्व हस्तान्तरण गरिएको कम्पनीले जनाएको छ ।

तिलोत्तमा होम्स्मा पहिलो चरणमा निर्माण सम्पन्न भएका ३० वटा घरमध्ये आधा घरमा बसोबास सुरु भएको छ भने बाँकी घरमा इन्टेरियरको काम सञ्चालनको क्रममा छ । कम्पनीका प्रवन्ध निर्देशक सहदेव खड्काले परियोजनाले निर्दिष्ट गरेका घरबाहेकका अन्य संरचनाहरु प्राथमिकताका आधारमा असोज अन्तिम साताबाट निर्माण सुरु गर्ने योजना रहेको जानकारी दिए । कोराना महामारीपछि मुलुकमा आएको आर्थिक विषम परिस्थितिका बाबजुद तिलोत्तमा होम्स्ले सम्झौताअनुसार काम अघि बढाउनु सकारात्मक रहेको घरधनी शंकरप्रसाद पौडेलले बताए । उनले सम्झौताअनुसार परियोजनाले बनाउने अन्य भौतिक पूर्वाधार निर्माणको काम पनि छिट्टै अघि बढ्ने विश्वास गरे ।

कम्पनीले तिलोत्तमा—७ भलबारीमा झण्डै ६ विगाहा क्षेत्रफलमा लुम्बिनी प्रदेशकैं पहिलो आवास विकास परियोजनामा सञ्चालन गरेको छ । यस क्षेत्रको सबैभन्दा पहिलो आकर्षक आवास परियोजनाप्रति सबैले चासो र उत्सुकता जनाइरहँदा कम्पनीले घरधनीलाई स्वामित्व हस्तान्तरण सुरु गरेको हो । यहाँ जग्गा र घरको क्षेत्रफलको आधारमा ग्रुप ए मा ४२ वटा ग्रप बी मा ६७ वटा घरहरु निर्माण हुँदै छन् ।

गु्रप ए मा पर्ने घरको कुल क्षेत्रफल १५ धुर र भवन २९०० स्क्वायर फुट (बिल्ड अप एरिया) र गु्रप बी मा पर्ने घरको कुल क्षेत्रफल १० धुर र भवन २२०० स्क्वायर फुट (बिल्ड अप एरिया) मा रहेका छन् । परियोजनास्थल कम्पाण्ड भित्र सबै घरपरिवारले उपयोग गर्न मिल्नेगरी अत्याधुनिक कमर्शियल कम्प्लेस, सामुदायिक भवन, ब्याडमिन्टन कवर्ड हल, बास्केटबल कोर्ट, स्वीमिङ्ग पुल, चिल्ड्रेन्स पार्क, जिमखाना, मन्दिर, हेल्थक्लव, रेष्टुरेन्ट, सैलुन, ब्युटीपार्लर, ग्रीन जोन रहनेछन् । यस्तै परियोजना स्थलभित्र मुल बाटो २६ फुट र सहायक बाटो २४ फुटका रहनेछन् ।

कम्पनीका प्रवन्ध निर्देशक खड्काले सरकारले निर्धारण गरेका मापदण्डलाई पालना गरी सम्पूर्ण सुविधा एकै ठाउँमा प्राप्त हुनेगरी सुरक्षित र स्मार्ट आवास क्षेत्र निर्माण गर्ने सरकार नीतिअनुरुप निजी क्षेत्रबाट यो परियोजना कार्यान्वयन भैरहेको बताए । यो परियोजनाको लागत २ अर्ब बढी छ । परियोजना अन्तर्गत् बन्ने घर तथा अन्य भौतिक पूर्वाधार निर्माणमा प्रयोग हुने सामाग्री सरकारले तोकेको मापदण्डअनुसारका रहेको र निर्माण कार्य पूर्णतः ईञ्जिनियरको सुपरीवेक्षणमा भैरहेको उनले बताए । परियोजना निर्माण स्थलको माटो परीक्षण गरी त्यसको आधारमा नक्सा डिजाइन गरिएकोले यहाँ बन्ने घरहरु भूकम्प प्रतिरोधात्मक रहेको कम्पनीले जनाएको छ ।

परियोजना स्थलमा ढल निकास, खानेपानी व्यवस्थापन, टेलिफोन, विद्युत् जस्ता पूर्वाधार विकासको काम कम्पनी आफैंले गरेको छ । परियोजना अन्तर्गत् रहने सार्वजनिक स्थान तथा पूर्वाधारको सञ्चालन तथा व्यवस्थापनको जिम्मा स्थानीय सोसाइटी आफैंले गर्ने अध्यक्ष वनको भनाइ छ ।