खोज

तिलोत्तमा, २८ वैशाख ।

तिलोत्तमा नगरपालिकामा करिब आठ वर्षदेखि अमिन पदमा कार्यरत रहेका इश्वरी भण्डारीको उपचारको क्रममा निधन भएको छ। उनी विगत केही समयदेखि अस्वस्थ भई उपचाररत रहँदा शुक्रबार काठमाडौँमा उनको असामयिक निधन भएको नगरपालिकाले पुष्टि गरेको छ।

नगरपालिकाले निधनप्रति दुःख व्यक्त गर्दै प्रमुख प्रशासकीय अधिकृत नारायण अर्यालको हस्ताक्षरमा शोक विज्ञप्ति जारी गरिएको थियो। विज्ञप्तिमा नगरपालिकाका कर्मठ कर्मचारीको असमयिक निधनले संस्थालाई अपूरणीय क्षति पुगेको उल्लेख गरिएको छ। सोही दिन नगरपालिकामा शोक बिदा समेत दिइएको थियो।

तर, एकातिर कर्मचारीको निधनमा शोक विज्ञप्ति जारी गरिएको बेला अर्कोतर्फ दलित ज्ञान उत्सव कार्यक्रम बाजागाजा सहित भव्यरुपमा मनाइनुले विवाद र आलोचना जन्माएको छ। स्थानीयबासी र कर्मचारीहरुले नगरपालिकाले आफ्नै परिवारको सदस्य जस्तै कर्मचारीको निधनमा संवेदनशीलता नदेखाएको भन्दै प्रश्न उठाएका छन्।

“शोक विज्ञप्तिमा सहानुभूति जनाउने तर सोही दिन उत्सव मनाउनु दोहोरो चरित्र हो,” एक कर्मचारीले नाम नबताउने शर्तमा भने, “शोकको बेला उत्सव गर्नु संस्थागत मर्यादा विपरीत हो।”

तिलोत्तमा-६ निवासी भण्डारी नक्सा शाखामा कार्यरत थिए। उनी नगरपालिकामा इमान्दार र जिम्मेवार कर्मचारीका रूपमा परिचित थिए। नगरपालिकामा उनले सेवा दिँदै आएका आठ वर्षमा उनको व्यवहार र योगदानको सबैले प्रशंसा गरेका थिए।

नगर प्रमुख तथा सरोकारवालाले यस विषयमा औपचारिक टिप्पणी गरेका छैनन्, तर सामाजिक सञ्जाल तथा सार्वजनिक वृत्तमा विषयले बहस उत्पन्न गराएको छ।

यस घटनाले नगरपालिकामा शोक र कार्यक्रम संयोजनप्रतिको गम्भीरता र मानवीय संवेदनशीलतामा प्रश्न उठेको छ। स्थानीय नागरिक तथा कर्मचारीहरुले यस्ता दु:खद घटनामा संस्थाले थप जिम्मेवार र संवेदनशील भूमिका खेल्नुपर्नेमा सुबिधा सम्पन्न होटलमा बाजगाज सहित उत्सव मनाएको प्रति तिलोत्तमा बासी आम नागरिकले आलोचना गरेका छन ।

यस विषयमा प्रतिक्रिया लिन तिलोत्तमा नगरपालिकाका प्रमुख प्रशासकीय अधिकृत नारायण अर्यालसँग फोन सम्पर्क गर्न खोज्दा उनले फोन उठाएनन् । उनी प्रायः पत्रकारहरुसँग तर्किने गरेको एक कर्मचारीले बताए ।