खोज

सल्यान, ६ चैत ।

सल्यानका सातवटा क्याम्पस मध्ये अखिल क्रान्तिकारीले तीन र नेवि संघ तथा अनेरास्ववियुले दुई दुई क्याम्पसमा नेतृत्व पाएका छन् । स्वतन्त्र विद्यार्थी युनियन (स्ववियु) निर्वाचन अन्तर्गत तीन क्याम्पसमा सर्वसम्मत नेतृत्व चयन भएको हो भने चार क्याम्पसमा मतदान मार्फत नेतृत्व चयन गरिएको हो ।

चारवटा क्याम्पसमा भएको स्ववियु निर्वाचनमा नेविसंघ र अनेरास्ववियुको संयुक्त प्यानलले दुई र अखिल क्रान्तिकारीले दुई क्याम्पसमा आफ्नो पक्षमा नतिजा हात पारेका हुन् । अखिल क्रान्तिकारीले फारुला बहुमुखी क्याम्पस दार्मा र जनकल्याण क्याम्पस थारमारेमा जित हात पारेको हो भने अनेरास्ववियुले सल्यान बहुमुखी क्याम्पस खलंगा र नेविसंघले शिवजन क्याम्पसमा जित हात पारेको हो ।

सल्यान बहुमुखी क्याम्पसमा अनेरास्ववियु र नेविसंघका संयुक्त उम्मेदवार अनेरास्ववियुका विशाल पुनको प्यानल विजयी भएको छ । १२० मत ल्याएर पुन निर्वाचत भए । उनका प्रतिस्पर्धी अखिल क्रान्तिकारीका सितल कंवरले ३० मत प्राप्त गरेका थिए ।

यस्तै शिवजन क्याम्पसमा अनेरास्ववियू र नेविसंघ सयुंक्त प्यानलबाट नेविसंघका सञ्जय हमाल निर्वाचित भएका छन् । उनले १९४ मत ल्याए । उनको निकटतम प्रतिस्पर्धी अखिल क्रान्तिकारीका रोशन खड्कीले ८७ मत प्राप्त गरेको निर्वाचन समितिले जनाएको छ ।

फारुला बहुमुखी क्याम्पसमा अनेरास्ववियू, नेविसंघ, राप्रपा र विल्लव नेतृत्वको विद्यार्थी संगठनको सयुक्त प्यानललाई पराजित गर्दै अखिल क्रान्तिकारीको पुरै प्यानल विजयी भएको छ । अखिल क्रान्तिकारीकी हिमा शर्मा ६५ मत ल्याएर निर्वाचित भइन् भने उनका निकटतम प्रतिस्पर्धी उम्मेदवार निशान देवकोटाले ५१ मत ल्याएका छन् । २०५ मतदाता रहेको फारुला बहुमुखी क्याम्पस दार्मामा १३० मत खसेको थियो ।

यस्तै जनकल्याण क्याम्पस थारमारेमा अनेरास्ववियु र नेविसंघको संयुक्त गठबन्धनलाई पराजित गर्दै अखिल क्रान्तिकारीका गणेश ओली निर्वाचित भएका छन् । ओलीले १९६ मत ल्याएर निर्वाचित हुनु भएका हुन् । निकटतम प्रतिस्पर्धी सयुक्त गठबन्धनबाट नेविसंघका उम्मेदवार फलेन्द्र पुरीले १७८ मत ल्याएका हुन् । यस्तै अन्य पदमा भने गठबन्धनको संयुक्त प्यानल विजयी भएका छन । सचिवमा अनेरास्ववियुकी बिमला शर्मा १७८ मत र कोषाध्यक्षमा नवीन सुनार नेवि संघबाट १०५ मत ल्याएर विजयी भएका छन ।

अन्य तीन क्याम्पसमा भने निविर्रोध नेतृत्व चयन भइसकेको छ । बनगाड क्याम्पस बनगाडमा अखिल क्रान्तिकारीका जीवन विष्ट, शारदा क्याम्पसमा शंख मुलमा अनेरास्ववियुका विश्व खड्का र कपुरकोट बहुमुखी क्याम्पस कपुरकोटमा नेविसंघका झलक ओली निविर्रोध निर्वाचित भइसकेका छन् ।