खोज

नेपालगञ्ज, २ चैत। बाँकेको ‘जयन्दु बाल सुधार गृह’ मा वालबन्दीवीच कुटाकुटको घटनामा घाईते भएका ४९ जनालाई अस्पतालमा भर्ना गरिएको छ । कुटाकुटबाट सामान्यदेखी गम्भिर घाइते भएका ४९ जनालाई भेरी अस्पताल र संजिवनी अस्पतालमा भर्ना गरिएको हो ।

डुडुवा गाउँपालिका वडा नम्बर -६, असमानपुरमा रहेको ‘जयन्दु बाल सुधार गृह’ मा शुक्रबार मध्यराति देखी सुरु भएको तनाव शनिबार दिउँसो साम्य भएको थियो । बाँकेका प्रमुख जिल्ला अधिकारी धर्मराज जोशीले कुल ४९ जना बाल बन्दीलाई अस्पतालमा भर्ना गरिएको बताए ।

‘शुक्रबार राति ६ जना र शनिबार ४३ जना घाइते भएका छन्,’ प्रजिअ जोशीले भने ‘यि मध्ये सामान्य अवस्थादेखी केही गम्भिर चोट लागेकाहरु छन्, केहीले टाउको दुख्यो, अप्ठ्यारो भयो भनेपछि उनीहरुलाई पनि अस्पताल पुर्याएका छौं ।’ यि मध्ये गम्भिर घाइते दुई जनाको सिटी स्क्यान गरिएको प्रजिअ जोशीले जनाए । बाल बन्दीहरुले सुरक्षाका लागि खटिएका प्रहरीमाथी समेत इट्टा प्रहार गरेका थिए । इट्टा प्रहारबाट ३ जना प्रहरी समेत घाइते भएका छन् । घाइते प्रहरीको पनि स्थानीय अस्पतालमा उपचार भइरहेको छ ।

स्थिती नियन्त्रणमा शनिबार दिउँसोसम्म पनि प्रहरीलाई हम्य–हम्य परेको थियो । त्यसका लागि बाल सुधार गृहमा ठुलो संख्यामा सुरक्षाकर्मी परिचालन गरिएको थियो । कुटाकुट हुँदा सुधार गृहबाट ५/६ जना बालबन्दी भागेकोमा पछि सम्पर्कमा आईसकेको प्रजिअ जोशीले बताए ।