खोज

बुटवल, १८ माघ ।

लुम्बिनी प्रदेशका मुख्यमन्त्री चेतनारायण आचार्यले हरेक क्षेत्रमा श्रेष्ठता हासिल गर्ने हो भने विदेश जाने सपना देख्नु नपर्ने बताएका छ् ।

न्यू होराइजन अङ्ग्रेजी आवासीय माध्यमिक विद्यालय बुटवल–११ को ३५ औं वार्षिकोत्सव उद्घाटन गर्दै मुख्यमन्त्री आचार्यले हरेक क्षेत्रमा श्रेष्ठता हासिल गर्दा विदेश जाने सपना देख्नु नपर्ने बताएका हुन् ।

’म विद्यार्थीहरुलाई भन्न चाहन्छु हरेक क्षेत्रमा श्रेष्ठता हासिल गर्ने हो भने विदेश जाने सपना देख्नु पर्दैन’, उनले भने–’आफ्नै देशको भूमिमा अवसरहरुको सृजना गर्न, नव प्रवर्ततनको क्षेत्रमा काम गर्न सक्ने थुप्रै अवसर र क्षेत्रहरु छन् । देशलाई तपाईहरुको योगदानको खाँचो छ ।’

लुम्बिनी प्रदेशको समग्र शैक्षिक गुणस्तर र नतिजा सुधार्न प्रदेश सरकारले बिशेष योजना निर्माण गरेको समेत उनले बताए । “समग्र शिक्षाको गुणस्तर बढाउन छ । विद्यार्थीमा पठन संस्कृति, खोज, अनुसन्धानको विधिको माध्यमबाट अध्यापनमा सक्रिय बनाउनुपर्ने छ”–उनले भने–“एउटा विद्यालयको शैक्षिक अवस्था सुधार्न सबै पक्ष जिम्मेवार बन्न जरुरी छ ।”

प्रदेश सरकार शिक्षा क्षेत्रमा आमूल परिवर्तन गर्नेगरी अघि बढेको, सरकारको एकल प्रयासले मात्रै शिक्षा क्षेत्रको विकासलाई अघि बढाउन नसक्ने भन्दै उनले निजी क्षेत्रले शिक्षा क्षेत्रको विकासमा पु¥याएको योगदानको समेत चर्चा गरे । प्रदेश सरकारले निजी क्षेत्रलाई पनि साथमा लिएर अघि बढ्ने उनले स्पष्ट पारे ।

न्यू होराइजन विद्यालयले शैक्षिक क्षेत्रमा मात्र नभई बहुसरोकारका क्षेत्रमा दक्ष जनशक्ति उत्पादन गर्न महत्वपूर्ण योगदान पु¥याएको, लुम्बिनी प्रदेशबाट देशमै गुणस्तरीय शिक्षा र अब्बल नतिजा देखाउन सफल तथा उदाहरणीय यस विद्यालयबाट सामुदायिक तथा संस्थागत विद्यालयहरुले धेरै कुरा सिक्न सक्ने, विद्यालयलाई एउटा अध्ययन केन्द्रको रुपमा अघि बढाउन आवश्यक रहेको उनले बताए ।

वि.सं. २०५६ सालदेखि २०८१ सम्म आइपुग्दा धेरै परीक्षाहरु भए । त्यसको नतिजा हेर्ने हो भने पनि विद्यालयले आफूलाई सर्वोत्कृष्ट स्थानमा उभ्याउन सफल भएको सो अवसरमा जानकारी गराइएको थियो ।

कार्यक्रममा विद्यालय व्यवस्थापन समितिका अध्यक्ष ज्ञानेन्द्र कसजूले विद्यालयको इतिहासदेखि वर्तमानसम्मको चर्चा गर्दैै निजी विद्यालयमा छात्रवृत्तिमा अध्ययन गरिरहेका विद्यार्थीहरु सरकारी छात्रवृत्तिमा नपर्नु र विभेद हुनु दुर्भाग्य भएको बताए । स्थानीय सरकार यो विषयमा गम्भीर बन्नुपर्ने भन्दै उनले निजी विद्यालयमा पूर्ण छात्रवृत्तिमा पढिरहेका विद्यार्थीहरु सामुदायिक विद्यालय सरह नै भएको पनि बताए ।

संस्थाका प्राचार्य लोकनाथ उपाध्यायले विद्यालयले सञ्चालन गरिरहेका शैक्षिक एवं अन्य गतिविधिहरुमाथि प्रकाश पारेका थिए । त्यस्तै २०५६ सालको एसएलसीमा न्यू होराइजनबाट नेपालमै सर्वोत्कृष्ट हुन सफल डा. मनोज बोहोराले आफ्नो शैक्षिक अनुभवन सुनाउँदै मेहनत गर्नेलाई देशमै अवसर रहेको र आफू पनि विदेशबाट स्वदेश फर्किएर मुलुक र नागरिकको सेवामै समर्पित रहेको बताए ।

त्यस अवसरमा विद्यालयमा लामो समयदेखि अध्यापनरत प्राचार्य लोकनाथ उपाध्याय, उपप्राचार्यद्वय वासुदेव अर्याल र बालकृष्ण भण्डारीलाई दीर्घ सेवा पदकबाट सम्मान गरिएको थियो । कार्यक्रमका अवसरमा विद्यालयका शिक्षकद्वय हरिप्रसाद पौडेल र कल्पना कुसुमले पनि विद्यालयका गतिविधिहरुमाथि प्रकाश पारेका थिए । वार्षिकोत्सवका अवसरमा विद्यालयले तीन दिवसीय कार्यक्रम आयोजना गरेको थियो ।