खोज

स्याङ्जा, १७ माघ ।

यही माघ १८ गतेदेखि सुरु हुन लागेको संसदको हिउदे अधिवेशनबाट संविधान संशोधनको बहसले औपचारिक रूपमा प्रवेश पाउने नेपाली कांग्रेसका उपसभापति सांसद धनराज गुरुङले बताएका छन्।

नेपाली कांग्रेस स्याङ्जाको आयोजना र नेपाली कांग्रेस भिरकोट नगर कार्यसमितिको व्यवस्थापनमा भिरकोट नगरपालिका ३ मा रहेको भिरकोट सिटिहलमा सम्पन्न नेपाली कांग्रेस स्याङ्जाको एक सय दिने अभियानको समापन कार्यक्रममा बोल्दै पूर्व मन्त्री गुरुङले सबैको अपनत्व हुने गरी संविधान संशोधनको प्रक्रिया अगाडि बढ्ने बताएका छन्।

उनले भने, “यही हिउदे अधिवेशनबाट संविधान संशोधनको प्रक्रिया सुरु हुन्छ।”

कांग्रेस, एमाले, माओवादी, रास्वापा, राप्रपा, समाजवादी, मधेसवादी सबैको बीचमा सर्वदलीय समिति बनाएर प्रक्रिया अगाडि बढ्ने बताउँदै उनले संविधान संशोधन आजको आवश्यकता भएको हुँदा सबैको सहमतिमा संशोधनको प्रक्रिया अगाडि बढ्ने धारणा राखेका छन्। देशमा देखा परेका आर्थिक, संविधानिक जटिलता अन्त्य गर्न दुई पार्टीको संयुक्त सरकार बनेको प्रसंग जोड्दै यी दुई पार्टीलाई देशको समस्यासमाधान नगर्ने छुट नभएको समेत धारणा राखेका छन्।

रिठा लिएर घ्यू खान नहुने प्रसंग जोड्दै उनले सधैँ विदेशमा निर्भर हुने अर्थतन्त्र अन्त्य गर्नुपर्नेमा जोड दिए। विदेशबाट ल्याएको समानमा लगाएको करबाट उठेको रकमले देशमा सोचेजस्तो विकास गर्न नसकिने भन्दै देशकै आन्तरिक अर्थतन्त्र बलियो बनाउन पनि यतिबेला सबै राजनीतिक दल एक ठाउँमा आउनुपर्नेमा जोड दिए।

कार्यक्रमलाई सम्बोधन गर्दै पूर्व मन्त्री गुरुङले कांग्रेस भित्रको एकता स्याङ्जाबाट सुरु गरिएको उद्घोष गरे। उनले भने, “शहीद दिवस यिनै शहीदहरुलाई साक्षी राखेर स्याङ्जाबाट एकता अभियान सुरु गरेका छौं।” पार्टीभित्रको गुटबन्दीले सिमिले व्यक्तिले पद प्राप्त गरे पनि कांग्रेसको लक्ष्य प्राप्ति नहुने उनको भनाइ थियो। पार्टीको लक्ष्य प्राप्ति गर्न सबैले गुट त्याग्न उनले आग्रह गरेका छन्।