काठमाडौं, १० माघ।
भैरहवाको गौतमबुद्ध अन्तर्राष्ट्रिय विमानस्थलमा हुस्सुका कारण जहाज अवतरणमा हुने समस्या समाधान गर्न नयाँ प्रणाली लागू गरिएको छ। आजदेखि ‘रिक्वायर्ड नेभिगेशन पर्फमेन्स अथोराइजेशन रिक्वायर्ड’ (आरएनपीएआर) प्रणाली लागू भएको हो।
यस नयाँ प्रणाली लागू भएपछि अब जम्मा ८०० मिटरको भिजिबिलिटीमा पनि जहाज अवतरण गर्न सकिने छ, जबकि पहिलेदेखि ‘भीओआर’ प्रणालीअन्तर्गत न्यूनतम १८०० मिटर भिजिबिलिटी आवश्यक थियो। हिउँदको समयमा भैरहवा विमानस्थलमा बाक्लो हुस्सुका कारण उडान र अवतरणमा समस्या आएकाले यो नयाँ प्रणाली सञ्चालनमा ल्याइएको विमानस्थलका प्रमुख प्रतापबाबु तिवारीले जानकारी दिनुभयो।
नयाँ प्रणालीअनुसार, वायु सेवा कम्पनीहरूले नेपाल नागरिक उड्डयन प्राधिकरणसँग अनुमति लिएर कम भिजिबिलिटीमा उडान गर्न सक्छन्। यस प्रणालीको उपयोगका लागि पाइलटलाई विशेष तालिम दिनुका साथै जहाजमा विशेष उपकरण प्रयोग गर्नुपर्ने प्राधिकरणले बताएको छ। भू–उपग्रहमा आधारित यो प्रणाली अहिले त्रिभुवन अन्तर्राष्ट्रिय विमानस्थलमा पनि सञ्चालनमा रहेको छ।
