खोज

जितपुर, १० माघ ।
कपिलवस्तु जेसिजको आगामी नेतृत्व छनोटका लागि चुनावी माहोल तात्तिँदै गएको छ । वर्ष २०२५ का लागि अध्यक्ष, कार्यकारीणी उपाध्यक्ष र उपाध्यक्ष पदमा उम्मेदवारहरूको मनोनयन दर्तासँगै जेसिजको चुनावी सरगर्मी उच्च बिन्दुमा पुगेको हो । यस वर्ष नेतृत्व चयनले मात्र नभई संगठनको भविष्य र राजनीतिक सन्तुलनलाई समेत प्रभावित पार्ने अनुमान गरिएको छ ।
अध्यक्ष पदका लागि यो पटक चार उम्मेदवारले दाबी प्रस्तुत गरेका छन् । जनक प्रसाद बेल्वासे, झबिन्द्र खनाल, शुनिल पाण्डे र मदन पौडेलबीचको प्रतिस्पर्धाले कपिलवस्तु जेसिजको नेतृत्व चयनलाई थप रोचक बनाएको छ । यी सबै उम्मेदवारहरू आ–आफ्ना योग्यतासहित मतदातालाई आफ्नो पक्षमा ल्याउन लागिपरेका छन् । अध्यक्ष पदका लागि हुने यो प्रतिस्पर्धाले संस्थाको रणनीतिक योजना र उद्देश्यमा नयाँ दृष्टिकोण ल्याउने अपेक्षा गरिएको छ ।

कार्यकारीणी उपाध्यक्ष पदका लागि पाँचजना उम्मेदवारको मनोनयन दर्ता भएको छ । रितु खरेल, खिमानन्द घिमिरे, किरण घिमिरे, राजन अर्याल, र कमल घिमिरेले यस पदका लागि आफ्नो दाबी प्रस्तुत गरेका छन् । यस पदमा दुईजनामात्र चयन गरिने भएकाले प्रतिस्पर्धा झन् कडा बन्ने देखिएको छ । उम्मेदवारहरू आ–आफ्ना एजेन्डा र योजनाहरू सार्वजनिक गर्दै मतदातासँग प्रत्यक्ष सम्पर्कमा जुटेका छन् । उपाध्यक्ष पदका लागि गरिमा घिमिरे, निलकमल थारु, शंशाक पौडेल, शुनिल घिमिरे, र दिनेश भण्डारी चुनावी मैदानमा छन् । यस पदमा चार उम्मेदवार चयन हुने भए पनि अन्तिम नतिजा कसको पक्षमा जान्छ भन्ने विषयले सबैमा उत्सुकता थपेको छ । उम्मेदवारहरूले आफ्नो अनुभव र योगदानलाई अगाडि राख्दै समर्थन जुटाउन प्रयास गरिरहेका छन् ।

उम्मेदवार र समर्थकहरूबीच चुनावी तयारी तीव्र भए पनि निर्वाचनको मिति अझै निर्धारण हुन नसक्दा केही असन्तोष देखिएको छ । यसले चुनावी गतिविधिमा सक्रिय रहेका सदस्यहरूको धैर्यतामा असर गरेको छ । कपिलवस्तु जेसिजको यो निर्वाचनले संगठनभित्रको राजनीतिक सन्तुलनलाई पुनः परिभाषित गर्ने विश्वास गरिएको छ । नयाँ नेतृत्वले संस्था विकासका लागि ठोस कदम चाल्ने र स्थानीयस्तरमा जेसिजलाई थप प्रभावकारी बनाउने अपेक्षा गरिएको छ ।
अबको कसको पक्षमा रहनेछ भन्ने प्रश्नले सबैको ध्यान तानेको छ । आगामी केही दिनभित्र नै निर्वाचन मिति तय हुने र कपिलवस्तु जेसिजले नयाँ नेतृत्व पाउने छ ।