खोज

सल्यान, २७ पुस ।
पाठेघरको मुखको क्यान्सरविरुद्धको एचपीभी (ह्युमन प्यापीलोमा भाइरस) खोप अभियान अन्तर्गत सल्यानका करिव १३ हजार किशोरीहरूलाइ खोप लगाइने भएको छ । यसले पाठेघरको क्यान्सरको प्रमुख कारण मानिने एचपीभी भाइरसको संक्रमणलाई रोक्न महत्वपुर्ण भुमिका खेल्ने बताइएको छ ।
देशब्यापी अभियान अन्तर्गत सल्यानमा २ सय ३७ खोप केन्द्रमार्फत १२ हजार ९ सय ३८ किशोरीहरूलाई खोप दिनका लागि तयारी गरिएको छ । स्वास्थ्य सेवा कार्यालयका प्रमख डा. अर्जुन बुढामगरका अनुसार विद्यालय जाने किशोरीलाई विद्यालयमै खोप केन्द्र निर्माण गरी खोप लगाइनेछ भने विद्यालय बाहिर रहेका किशोरीहरूलाई अभियानको अन्तिम दिन खोप दिने योजना छ । खोप कार्यक्रम आगामी माघ २२ गतेदेखि सञ्चालन हुनेछ ।
बिद्यालयमा अध्ययन गर्ने कक्षा ६ देखि १० सम्मका छात्राहरू र बिद्यालय नजाने १० देखि १४ वर्ष उमेर समूहका किशोरीहरूलाई खोप लगाइनेछ । किशोरीहरूलाइ खोप दिनुको मुख्य कारण उनीहरूको शरीरले खोपप्रति राम्रो प्रतिक्रिया दिने तथ्य रहेको स्वास्थ्य सेवा कार्यालयले जनाएको छ ।
यस उमेरमा खोप लगाउँदा भाइरसविरुद्ध बलियो प्रतिरक्षा प्रणाली विकास हुन्छ । सरकारको यो अभियान मार्फत किशोरीहरूलाई खोप लगाउने मात्रै नभई ३० देखि ४९ वर्षका महिलाहरूलाई पनि पाठेघरको क्यान्सर परीक्षणमा ल्याउने लक्ष्य राखेको छ । यो कदमले महिलाहरूको स्वास्थ्य सुरक्षामा थप पहल हुने अपेक्षा गरिएको छ । डाक्टर बुढामगरका अनुसार जिल्लाका खोप केन्द्रमा २ सय ५० स्वास्थ्यकर्मी र स्वयंसेवक परिचालन गरिने छ । जिल्लाका सबै स्थानीय तहहरूसँग खोप अभियान सञ्चालन गर्न समन्वयात्मक कार्यक्रम गरिने उनले जनाए ।
पाठेघरको मुखको क्यान्सर नेपालमा महिलाहरूमा हुने दोस्रो सबैभन्दा धेरै क्यान्सर हो । ह्युमन प्यापीलोमा भाइरस (एचपीभी) संक्रमणका कारण यो क्यान्सर हुने तथ्य अनुसन्धानले देखाएको छ । एचपीभी भाइरस सामान्यतया यौन सम्पर्कबाट सर्ने रोग हो र यसको संक्रमण धेरैजसो किशोरावस्थामा सुरु हुन्छ । समयमै खोप लगाएर यो संक्रमण रोक्न सकिने भएकाले किशोरीहरूलाई लक्षित गरेर सरकारले अभियान सुरु गरेको हो ।
९० प्रतिशत किशोरीलाई खोप पुर्याउने, ३० देखि ४९ वर्ष उमेर समूहका ९० प्रतिशत महिलालाई पाठेघरको क्यान्सरको परीक्षण गर्ने र परीक्षणबाट पुष्टि भएका ९० प्रतिशतलाई उपचारको दायरामा ल्याउने गरी सरकारले खोप अभियान सुरु गरेको स्वास्थ्य सेवा कार्यलय सल्यानका खोप अधिकृत तारा रिजालले जनाए ।
महिलाहरूमा पाठेघरको क्यान्सर रोकथामको यो प्रयासले स्वास्थ्य क्षेत्रमा सुधार ल्याउने र ग्रामीण समुदायमा सचेतना फैलाउन सघाउ पु¥याउने बिश्वास गरिएको छ । स्वास्थ्यकर्मी र स्वयंसेवक परिचालन गरेर संचालन हुने यस अभियानले स्थानीय समुदायमा सचेतता फैलाउने अपेक्षा गरिएको छ ।