खोज

बुटवल, २५ पुस ।
लुम्बिनी प्रादेशिक अस्पतालमा नयाँ अपरेशन थिएटर थपिएपछि पित्तथैलीको पत्थरी समस्याको लेजर अपरेशनलाई विशेष प्राथमिकता दिइएको छ । लामो समयसम्म पालो पर्खनुपर्ने समस्या समाधान गर्न अस्पतालले नयाँ रणनीति अवलम्बन गरेको छ । सर्जन विभाग प्रमुख डा. भुवन पौडेलका अनुसार लुम्बिनी प्रदेश सरकारको स्वास्थ्य मन्त्रालयद्वारा सञ्चालित सेवा विस्तार कार्यक्रम अन्तर्गत प्रसूति सेवाका लागि छुट्टै अपरेशन थिएटरको व्यवस्थापन गरिएको छ । यसले पुरानो थिएटरलाई अन्य शल्यक्रियाका लागि प्रयोग गर्न सक्ने बनाएको छ । थिएटर थपिएसँगै सातामा ४ वटा पित्तथैली अपरेशन हुने गरेकोमा अब यो संख्या ६ सम्म पुगेको छ ।
विशेष गरी पित्तथैलीमा पत्थरी देखिने समस्याको समाधानका लागि अपरेशनमा जोड दिइएको छ । सामाजिक सेवा कार्यक्रम र स्वास्थ्य बीमा योजनाका कारण बिरामीको चाप पनि वृद्धि भएको छ ।
डा. पौडेलले भने, “पित्तथैलीमा पत्थरी देखिने समस्या सामान्यजस्तै भएको छ, तर बिरामीले तुरुन्तै लेजर अपरेशन गर्नुपर्ने सोच राख्ने भएकाले पालो व्यवस्थापनमा चुनौती छ ।” हाल अस्पतालमा ५ जना सर्जन चिकित्सक कार्यरत छन् । थप एक सर्जनको आवश्यकता रहेको डा. पौडेलले बताए । सीमित जनशक्तिका कारण सर्जिकल र ओपीडी सेवा सम्हाल्न दबाब रहेको उनले जनाए । “प्रत्येक दिन २–३ वटा अपरेशन मात्र सम्भव छ, केही जटिल केसमा ३–४ घण्टासम्म लाग्ने भएकाले पालो व्यवस्थापन गर्नुपर्छ,” उनले भने ।
अस्पतालले प्लास्टिक सर्जरी, स्तन शल्यक्रिया (ब्रेष्ट सर्जरी) लगायतका सेवामा पनि विशेषज्ञता थप गरेको छ। सेवा विस्तारका लागि अस्पताल प्रशासन र विकास समितिसँग समन्वय भइरहेको र आगामी दिनमा अपरेशन दर अझै बढाउने तयारी भइरहेको डा. पौडेलले जानकारी दिए । थिएटर थप र सेवा विस्तारले बिरामीलाई समयमै उपचार सुबिधा उपलब्ध गराउने प्रयासलाई सफल बनाउँदै लैजाने अपेक्षा गरिएको गरिएको छ ।