खोज

बुटवल।

काठमाडौँबाट नेपालगन्ज जाँदै गरेको एक टान्सपोर्ट गाडीमा राजस्व छली गरी ल्याइएको ३० लाख रुपैयाँको इलेक्ट्रिक चुरोट (भेप) राजस्व अनुसन्धान कार्यालय बुटवलले बरामद गरेको छ।

चीनबाट ल्याइएको इलेक्ट्रिक चुरोट नेपालगन्ज हुँदै भारतको लैजाने तयारी गरिएको सूचनाको आधारमा, पूर्वपश्चिम राजमार्ग अन्तर्गत बुटवलमा चेकजाँच गर्दा भेरी टान्सपोर्ट नेपालगन्जको ट्रकमा २६ सय पिस भेप फेला परेका थिए। राजस्व अनुसन्धान कार्यालय बुटवलका अनुसार, उक्त ट्रकमा २ सय पिसका दरले १३ कार्टुन भेप भेटिएको थियो।

यस घटनामा डायमन्ड नेपाल इन्टरनेसनलका प्रतिनिधि रोजन न्यौपाने (स्याङ्जा, कालिगण्डी गाउँपालिका-५) र सनाउल्ह अन्सारी (बाँके, नेपालगन्ज)लाई पक्राउ गरिएको छ। राजस्व अनुसन्धान कार्यालय बुटवलका प्रमुख विवेक घिमिरेका अनुसार, उनीहरूबाट बिगो बमोजिम ६२ लाख रुपैयाँ धरौटी माग गरिएको छ।

अधिकारीका अनुसार, ३० लाख रुपैयाँ मूल्य बराबरको भेपको लागि जम्मा १ सय रुपैयाँ मात्र बिल काटिएको थियो। चीनबाट उक्त चुरोट नेपालगन्जस्थित जमुनाहा नाकाबाट भारतमा महँगो मूल्यमा बिक्री गर्ने उद्देश्यले ल्याइएको अनुमान गरिएको छ। राजस्व कार्यालयले यस विषयमा थप अनुसन्धान सुरु गरेको जनाएको छ।