खोज

सुर्खेत, १८ पुस ।

कर्णाली सरकारले चालु आर्थिक वर्षको पाँच महिनामा विकास बजेटतर्फ एक अर्ब खर्च गरेको छ । चालु आर्थिक वर्षका लागि विकास बजेटतर्फ प्रदेश सरकारले मंसिर मसान्तसम्ममा एक अर्ब चार करोड ४२ लाख ५३ हजार खर्च गरेको छ । चालु आर्थिक वर्षका लागि सरकारले विकास बजेटतर्फ १८ अर्ब ७५ करोड ५१ लाख ६८ हजार रुपैयाँ विनियोजन गरेको थियो ।

उक्त बजेट अन्तर्गत मङ्सिर महिनामा १४ करोड १० लाख ५१ हजार रुपैयाँ कार्यान्वयन गरेको छ । कार्तिक मसान्तसम्म प्रदेश सरकारले ९० करोड ३२ लाख २ हजार रुपैयाँ विकास बजेट कार्यान्वयन गरेको प्रदेश लेखा नियन्त्रक कार्यालयले जनाएको छ । गतवर्ष यो अवधिसम्म ९६ करोड रकम मात्रै कार्यान्वयन भएको थियो । प्रदेश सरकारले चालु आर्थिक वर्षमा ८० प्रतिशत विकास बजेट खर्च गर्ने लक्ष्य राखेको छ ।

चालु आर्थिक वर्षमा भौतिक पूर्वाधार तथा सहरी विकास मन्त्रालयले मङ्सिर मसान्तसम्म ५५ करोड ५० लाख ५२ हजार ९३५ रुपैयाँ कार्यान्वयन गर्न सकेको छ । जलस्रोत तथा ऊर्जा मन्त्रालयले यो अवधिसम्म ९ करोड ६४ लाख २१ हजार रुपैयाँ कार्यान्वयन गरेको छ भने भूमि, व्यवस्था, कृषि तथा सहकारी मन्त्रालयले १ करोड ७० लाख ८० हजार, सामाजिक विकास मन्त्रालयले ३२ करोड ५३ लाख ९४ हजार रुपैयाँ कार्यान्वयन गरेको छ । उद्योग, पर्यटन, वन तथा वातावरण मन्त्रालयले ३ करोड ४३ लाख ६९ हजार रुपैयाँ कार्यान्वयन गरेको प्रदेश लेखा नियन्त्रक कार्यालयले जनाएको छ । यस्तै अर्थ मन्त्रालयले पाँच महिनाको अवधिमा ८३ लाख ९९ हजार रुपैयाँ कार्यान्वयन गरेको छ ।

मुख्यमन्त्री तथा मन्त्रीपरिषद् कार्यालयका सचिव आनन्द सारुका अनुसार फागुन पछि योजनाका भुक्तानीहरु गएपछि विकास बजेट खर्च बढ्ने बताए । उनका अनुसार अघिल्लो वर्षको बाँकी भुक्तानी नहुँदा पनि विकास बजेटको खर्च कम भएको देखिएको हो । ‘अघिल्लो आर्थिक वर्षमा बाँकी भुक्तानीहरु भएकोले पनि बजेट खर्च बढी देखिएको थियो’ उनले भने, ‘चालु आर्थिक वर्षमा बाँकी भुत्तानीहरु नरहेकोले पनि अहिलेसम्म कम देखिएको हो अब दोस्रो चौमासिकको अन्तिमबाट खर्च बढ्छ ।’