खोज

लमही, १६ पुस ।

साढे तीन महिनापछि लुम्बिनी प्रदेश सभाको पाँचौं अधिवेशन मंगलबारदेखि सुरु भएको छ । हिउँदे अधिवेशनको पहिलो बैठकमा सभामुख तुलाराम घर्तीमगरले प्रदेश प्रमुख कार्यालयबाट प्राप्त विभिन्न पत्रहरु पढेर सुनाए । उनले चौथो अधिवेशनमा पारित भएका विधेयक, प्रमाणीकरण भएका विधेयक र पुनर्विचारका लागि फिर्ता पठाइएका विधेयकहरूको विवरण प्रस्तुत गरे ।

सभामुखले कार्यव्यवस्था परामर्श समितिको पुनर्गठन गरिएको जानकारी पनि दिए । यस समितिमा तुलसीप्रसाद चौधरी, यमुना रोका तामाङ, जमुना ढकाल, निमा गिरी, इन्द्रजीत थारु लगायत अन्य सदस्यहरू समावेश छन्।त्यसै गरि बैठकमा बाँके र बर्दियालाई कर्णाली प्रदेशमा गाभ्ने विषयको बहसले प्रवेश पायो । नेकपा माओवादी केन्द्रका प्रमुख सचेतक इन्द्रजीत थारु र नागरिक उन्मुक्ति पार्टीका प्रमुख सचेतक राजकुमार चौधरीले संविधान विरोधी गतिविधिहरूप्रति कडा आपत्ति जनाए । थारुले भने, “बाँके र बर्दियालाई कर्णालीमा गाभ्ने छलफल प्रदेश र संविधानमाथिको हमला हो। सरकारले यसप्रति गम्भीर ध्यान दिनुपर्छ ।”

यस्तै, चौधरीले यो विषय जनभावनाविपरीत रहेको भन्दै सरकारलाई तत्काल कदम चाल्न आग्रह गरे । नेकपा एमालेका प्रमुख सचेतक तुलसीप्रसाद चौधरीले प्रदेश सरकारको गतिविधिले नागरिकमा आशा जगाएको भन्दै यसको निरन्तरताको आवश्यकता औंल्याए । उनले हिउँदे अधिवेशनले सरकारलाई मार्गनिर्देशन गर्ने विश्वास व्यक्त गरे ।

नेपाली कांग्रेसकी प्रमुख सचेतक जमुना ढकालले संघीय सरकारसँग अधिकार लिन प्रदेशले प्रभावकारी भूमिका खेल्नुपर्नेमा जोड दिइन् । उनले प्रदेशको सुदृढीकरण र जनताको समस्या समाधानका लागि ठोस कदम चाल्न आग्रह गरिन् ।

बैठकमा उठेका अन्य विषयहरू

बैठकमा प्रदेशसभा सदस्यहरूले बार्षिक योजनाको कार्यान्वयनलाई तीव्रता दिनुपर्ने, महिला, बालबालिका तथा ज्येष्ठ नागरिक मन्त्रालयको प्रभावकारिता बढाउनुपर्ने, र सरकारका सुधारात्मक कदमहरूलाई प्राथमिकता दिनुपर्ने विषयमा धारणा राखे ।