खोज

काठमाडौं, १६ पुस।

नेपालमा पहिलो पटक वंशानुगत परीक्षण ‘जिन सिक्वेन्सिङ’ सम्भव भएको छ। यसअघि यो परीक्षण नेपालमा गर्न सकिँदैन थियो, तर अब राष्ट्रिय जनस्वास्थ्य प्रयोगशालामा यसलाई गर्न सकिने स्वास्थ्य तथा जनसंख्या मन्त्रालयले जानकारी दिएको छ।

यसअघि यस्ता परीक्षणका लागि नमुना विदेश पठाउनु पर्ने बाध्यता थियो, तर अब प्रयोगशालाले सफलतापूर्वक परीक्षण गरेपछि वंशानुगत परीक्षण देशभित्रै सम्भव भएको हो।

प्रयोगशालाका प्रमुख रञ्जनराज भट्टका अनुसार, राष्ट्रिय जनस्वास्थ्य प्रयोगशाला अब देशभरबाट प्राप्त स्तन क्यान्सरका वंशानुगत नमूनाहरूको परीक्षण गर्न सक्षम हुनेछ। उनले भने, “यस्तो परीक्षण अब पहिलो पटक नेपालमा सम्भव भएको हो र अब देशबाहिर नमुना पठाउनु पर्दैन।”

यस परीक्षणले वंशाणुगत कारणले हुने स्तन क्यान्सरको सम्भावना कुनै व्यक्तिका परिवारमा छ कि छैन, त्यसको पहिचान गर्न मद्दत पुर्‍याउनेछ। प्रारम्भिक चरणमा उपचार गर्दा व्यक्तिको परिवारलाई क्यान्सरबाट बचाउन सकिने चिकित्सकहरूको भनाइ छ।

भारतमा यस्ता परीक्षणको शुल्क ६० हजार रुपैयाँसम्म पर्न सक्ने, र विदेश पठाउँदा समयको खपत र शुल्‍क पनि बढी लाग्ने समस्यासँगै, नेपालमा यो परीक्षण अब ३० हजार रुपैयाँ भित्र गर्न सकिनेछ।

अहिले नेपालमा वर्षमा लगभग २,००० जना स्तन क्यान्सरको वंशानुगत परीक्षण गराउँदै आएका छन्, र ती सबै परीक्षण अब राष्ट्रिय जनस्वास्थ्य प्रयोगशालामा नियमित रूपमा गर्न सकिनेछ।