© २०२३
बुटवल, ९ पुस । स्कलर्स होम ईगलिस बोर्डिङ स्कुलको ३३ औ वार्षिकोत्सवको अवसर पारेर सामाजिक उत्तरदायित्व अन्तरगत ईन्ट्रयाक्ट क्लब अफ स्कलर्स होमद्वारा कपडा तथा खाना बैंकलाई सहयोग हस्तान्तरण गरिएको छ । बुटवल उपमहानगरपालिकाद्धारा स्थापना गरिएको कपडा बैकमा विद्यालयका उपप्राचार्य टिकाराम गौतम, क्लबका अध्यक्ष रिवाज भण्डारी, सचिव दिसिजा भट्टराईले कपडा तथा खाना बैंकका सुष्मा गौतममार्फत मंगलबार करीब डेढ सय जोडी कपडाहरु हस्तान्तरण गरिएको हो ।
कार्यक्रममा विद्यालयका उपप्राचार्य टिकाराम गौतमले विद्यार्थीहरुद्वारा स्वयं सहयोग जुटाएर घरघरबाट संकलन गरिएको न्यानो लुगा हस्तान्तरण गरिएको बताए । विद्यार्थीहरुको रचनात्मक तथा सामाजिक कार्यको उनले प्रर्शसा गरे ।
कार्यक्रममा क्लबका अध्यक्ष रिवाज भण्डारीले सामाजिक भावका साथ स्थापना भएको रोट्याक्टमा आवद्ध भएर धेरै सिक्न सफल भएको बताए । शिक्षा, स्वास्थ्य, सरसफाई र पर्यावरणको सुरक्षा सबै नागरिकको दायित्व भएको उनले बताए ।
कपडा तथा खाना बैंककी सुष्मा गौतमले नगरमा रहेका न्युन आय भएका नगरबासीहरुलाई कपडा बैकबाट न्यानो लुगा उपलब्ध गराईदै आएको बताईन । नगरबासीहरुको सहयोगबाट नै यो बैक चलेको उनले बताईन ।
वार्षिकोत्सवको अवसरमा बुधबार विद्यालयमा ११ औ जिल्ला स्तरिय अन्तर मा वि हाजिरिजवाफ प्रतियोगिता विहिबार मुल समारोह पुरस्कार वितरण तथा सम्मान समारोह आयोजना हुने विद्यालयका प्रशासन प्रमुख लोक प्रसाद भण्डारीले बताए ।