खोज

काठमाडौं, ८ पुस ।

परराष्ट्रमन्त्री आरजु राणा देउवा आज भारतको नयाँ दिल्लीबाट स्वदेश फर्कन लागेकी छन्। उनका सचिवालयका अनुसार, मन्त्री देउवा दिल्लीस्थित एपोलो अस्पतालमा नियमित स्वास्थ्य परीक्षणको लागि गएकी थिइन्। यस क्रममा उनले बाइल्याटरल टोटल हिप रिप्लेस्मेन्ट (टीएचआर) को फलोअप स्वास्थ्य परीक्षण गराएकी थिइन्।

भारतको दिल्ली जानु अघि, मन्त्री राणा नेदरल्याण्डको हेग स्थित अन्तर्राष्ट्रिय अदालतमा जलवायु न्याय (क्लाइमेट जस्टिस) को पक्षमा नेपालको तर्फबाट उपस्थित भएकी थिइन्। यस भ्रमणका क्रममा उनले बेल्जियम र जर्मनीमा द्विपक्षीय भेटघाट र कार्यक्रममा पनि सहभागिता जनाएकी थिइन्।

भारत भ्रमणको बारेमा प्रधानमन्त्री केपी शर्मा ओलीले केही दिन अघि झापामा गरेको कार्यक्रमको सम्बोधनमा भारत भ्रमणको योजना बनाएको कुरा सार्वजनिक गरेका थिए। यसै कारण, परराष्ट्रमन्त्री देउवा भारत गएकी हुँदा उनी भारतीय समकक्षी एस जयशंकरसँग भेट गर्ने अनुमान गरिएको थियो। तर, मन्त्री राणाको भ्रमण स्वास्थ्य परीक्षणको उद्देश्य मात्र रहेको र कुनै औपचारिक भेटघाट नभएको मन्त्रीका प्रेस सल्लाहकार एकराज पाठकले स्पष्ट पारेका छन्।

पाठकका अनुसार, मन्त्री राणाले जापान जाने योजना बनाएका थिए, तर त्यसका लागि उपयुक्त समय नपाएको र पछि दिल्लीबाट स्वास्थ्य परीक्षणको लागि यात्रा गरेको जानकारी दिएका छन्।