खोज

अर्घाखाँची,७ पुस ।

लुम्बिनी प्रदेशका अर्घाखाँची जिल्लाको पाणिनी गाउँपालिकामा विपन्न जेष्ठ नागरिकका लागि श्रवण शक्ति परीक्षण शिविर सञ्चालन गरिएको छ। यो शिविर कान नसुन्ने र वृद्ध नागरिकहरूको लागि विशेष गरी फाइदाजनक साबित भएको छ।

शिविरमा कान नसुन्ने वृद्धबृद्धा तथा विपन्न नागरिकलाई लक्षित गरी श्रवण शक्ति परीक्षण, हेयरिङ्ग एड सामग्री वितरण र अटिजमका बिरामीलाई निशुल्क परामर्श सेवा उपलब्ध गराइँदा जेष्ठ नागरिकहरू निकै खुशी भएका छन्।

गाउँपालिकाका प्रमुख प्रशासकीय अधिकृत रोमनाथ न्यौपानेका अनुसार, नाक, कान र घाटी रोग विशेषज्ञ डाक्टर शुसन साक्य र डाक्टर विद्वान भुसालको टोलीले बिरामीहरूको चेकजाँच गरेका थिए। यस शिविरले वृद्ध र विपन्न नागरिकहरूको लागि प्रत्यक्ष फाइदा पुर्याएको र ठूलो सहयोग पु¥याएको गाउँपालिकाका अध्यक्ष टेकराज न्यौपानेले बताएका छन्।

पाणिनी गाउँपालिकाको सहयोगमा श्रवण हेयरिङ्ग एण्ड चाईल्ड केयर सेन्टरले आयोजना गरेको यस शिविरको उद्धाटन लुम्बिनी प्रदेश सरकारका भौतिक पूर्वाधार विकास मन्त्री भूमीश्वर ढकालले दीप प्रज्वलन गरी गरेका थिए। मन्त्री ढकालले स्वास्थ्य शिविरलाई अत्यन्त लाभकारी र उपयोगी रहेको उल्लेख गर्दै, प्रदेश सरकारले निरोगी र स्वस्थ नागरिक बनाउन विभिन्न कार्यक्रमहरू सञ्चालन गर्दै आएको बताए।

प्रदेश सांसद रामजी प्रसाद घिमिरेले यस्ता जनमैत्री कार्यक्रमहरूलाई सबै सरकारहरूको प्राथमिकता बनाउनुपर्ने र यस शिविरले प्रत्यक्ष फाइदा पुर्याउने विश्वास व्यक्त गरे।

शिविरमा १९२ जना नागरिकले सेवा लिए, जसमा ७ जनालाई निःशुल्क कान सुन्ने मेसिन वितरण गरिएको थियो। कार्यक्रम गाउँपालिकाका अध्यक्ष टेकराज न्यौपानेको अध्यक्षतामा सम्पन्न भएको हो, र प्रमुख प्रशासकीय अधिकृत रोमनाथ न्यौपानेले स्वागत मन्तव्य दिएका थिए।