खोज

काठमाडौं, ०१ पुस ।
काग्रेसका केन्द्रीय प्रतिनिधिहरूले संगठन प्रभावकारी हुन नसकेको, सदस्यता वितरण विधान अनुसार हुन नभएको, गुटगत समस्या वडातहसम्म रहेको, भ्रातृ संस्थाहरूमा विवाद रहेको लगायतका समस्या औंल्याएका छन् । कांग्रेसको सय दिने विशेष अभियानमा रहेका केन्द्रीय नेताहरूले जिल्ला पुग्दा पाटी उपल्लो तहले निम्त्याएको समस्या तलसम्म पुगेको भेटाए ।

पार्टी संगठनका लागि काम गर्नेगरी ७७ जिल्लामा प्रतिनिधि खटाइएको छ । ७ असोजदेखि सुरु भएको अभियान १६ पुसमा सकिदैछ । अर्खाखाँचीमा खटिएका केन्द्रीय सदस्य सञ्जय गौतमले पार्टी पंक्तिमा उत्साह नदेखिएको बताए । ‘संगठन राम्रो भएन नै भन्ने छ । भ्रातृ संस्थाहरू चलायमान छैनन् ।’ अभियानमा खटिने प्रतिनिधिका लागि पार्टी केन्द्रले कार्यादेश दिएर पठाएको थियो । प्रतिनिधिले वडा, पालिका, जिल्लाको बैठक बस्न नसकेको भए बैठक नियमित बस्ने वातावरण बनाउनुपर्ने कार्यादेश छ । विभिन्न तहका कार्य समितिलाई वार्षिक कार्यतालिका बनाउन लगाउने जिम्मेवारी दिइएको छ ।

जिल्लामा पुगेका प्रतिनिधिले पार्टीभित्रको समस्या समाधान गर्न लागेपनि माथिल्लो तहका नेताका कारणले सम्भव हुन नसक्ने अवस्था रहेको इलाममा खटिएका केन्द्रीय सदस्य नैनसिंह महरले बताए । ‘प्रतिनिधिले त्यहाँ समस्या भए समाधान गर्न लागेका हुन्छौं । माथिको नेताले मिलाउन नदिने नियत राखे विवाद समाधान गर्न सकिँदैन,’ महरले भने ।

क्रियाशील सदस्यता कार्ड पुगे÷नपुगेको अभिलेख राख्ने, सदस्यता कार्ड वितरण नभएको भए केन्द्रीय प्रतिनिधिले वितरणको व्यवस्था गर्नुपर्ने जिम्मेवारी दिइएको छ । तर, प्रतिनिधि खटिएका नेताहरूले क्रियाशील सदस्यता वितरण हुन नसकेको जानकारी गराएका छन् । कांग्रेसमा महाधिवेशन हुने वर्ष बाहेक हरेक वर्ष क्रियाशील सदस्यता वितरण र नवीकरण हुने विधानको व्यवस्था छ । विधान अनुसार सदस्यता वितरण नगरी महाधिवशेन भएकै वर्ष वितरण र नवीकरण गर्ने प्रचलन बनेको छ । विधान कार्यान्वयन गराउने गरी दुई महामन्त्री गगन थापा र विश्वप्रकाश शर्माले पटक पटक तल्लो तहलाई परिपत्र जारी गरेपनि क्रियाशील सदस्यता वितरण र नवीकरण तिव्रता पाउन सकेको छैन ।
पार्टीको चुनाव आएपछि मात्रै तात्तिने प्रवृत्ति पार्टीमा रहेको सिन्धुलीमा खटिएकी केन्द्रीय सदस्य प्रतिमा गौतमले बताइन् । गौतमका अनुसार ‘क्रियाशील सदस्यता वितरण र नवीकरण खासै अघि बढेको देखिएन । क्रियाशील सदस्यता म गएपछि सुरु भएको छ, ।’

क्रियाशील सदस्यता नवीकरण फारम प्राप्त भए नभएको, प्राप्त भएर पनि वितरण भए नभएको सबै अवस्था विश्लेषण गरी तत्काल नवीकरण प्रक्रिया अगाडि वढाउने केन्द्रीय प्रतिनिधिलाई कार्यादेश दिइएको छ । क्रियाशील नवीकरण सदस्यता फारम रोकिएको भए समस्या भए फुकाउने र वितरण सुनिश्चित गर्ने काम प्रतिनिधिको छ । क्रियाशील सदस्यता वितरण र नवीकरणमा उत्साह नआएको डोटीमा खटिएका केन्द्रीय सदस्य गुरु बराल बताउँछन् ।

महाधिवेशनको बेला मात्रै नवीकरण गर्ने कांग्रेसको रोग डोटीमा पनि देखेको बरालले सुनाए ।
केन्द्रीय प्रतिनिधिले भ्रातृ तथा शुभेच्छुक संस्थामा रहेका समस्या पनि समाधान गर्नुपर्नेछ । भ्रातृ एवं शुभेच्छुक संस्थामा विवाद भए त्यसको प्रकृति निक्र्यौल गरी समाधानका लागि समन्वय गर्नुपर्नेछ । डोटीमा खटिएका केन्द्रीय सदस्य बरालले दुई ठूला दल मिलेर सरकार बनाएकोप्रति जनता र कार्यकर्तामा गुनासो नसुनेको बताए ।