खोज

नवलपुर, १८ मङ्सिर ।

नवलपुरको कावासोतीमा शिक्षक तथा विद्यार्थीको प्रतिभा पहिचानका लागि जिल्लास्तरीय वक्तृत्वकला भएको छ । शिक्षक तथा विद्यार्थीमा अन्तर्निहीत क्षमताको पहिचान गरी प्रस्फुटन र विकास गर्ने मुख्य उद्देश्यका साथ दुइ दिने कार्यक्रमको आयोजना गरिएको सामाजिक विकास कार्यालय नवलपुरका प्रमुख कृष्ण पौडेलले बताएका छन् ।

आठ स्थानीय तहबाट छनोट गरि शिक्षक तथा विद्यार्थीका लागि वक्तृत्वकला, शिक्षक हाजिरीजवाफ, विद्यार्थी नृत्य गरी चार विधामा कार्यक्रमको आयोजना गरिएको उनले बताए । जसमध्ये गैडाकोट नगरपालिका, देवचुली नगरपालिका, कावासोती नगरपालिका, मध्यविन्दु नगरपालिका, बौदिकाली गाउँपालिका र बुलिङ्टार गाउँपालिकाका एक–एक शिक्षक तथा विद्यार्थीले वक्तृत्वकलामा सहभागिता जनाएका छन् भने हुप्सेकोट र विनयीत्रिवेणी गाउँपालिकाको सहभागिता नभएको जनाइएको छ ।

नतिजा सुधारमा शिक्षकको भूमिका शीर्षकमा शिक्षक वक्तृत्वकलामा भीमसेन आदर्श माविका शिक्षिका कृष्णकला काफ्लेले प्रथम स्थान हासिल गरेका छन् । त्यसैगरी जनता मावि कावासोती डण्डाका रामचन्द्र दाहाल द्वितीय र नारायणी मावि गैडाकोटका जगनाथ उपाध्याय तृतीय भएका छन् । यसैगरी विद्यार्थी वक्तृत्वकलाका लागि जेष्ठ नागरिकप्रति मेरो दायित्व शिर्षकमा त्रिभुवन बाल मावि कावासोती १७ का संस्कृति पौडेल प्रथम भएकी छन् । नवलपुर आवासीय मावि मध्यविन्दुका हिमासीं भण्डारी द्वितीय र नेपाल मावि देवचुलीका सुदिप पोख्रेल तृतीय हुनु भएका छन् । जिल्लामा प्रथम हुने शिक्षक र विद्यार्थीले प्रदेशस्तरीय वक्तृत्वकलामा भाग लिन पाउने सामाजिक विकास कार्यालय नवलपुरका प्रमुख पौडेलको भनाइ छ ।

विद्यार्थीलाइ सर्टिफिकेटमा मात्र धेरै नतिजा ल्याउन प्रेरित गरेर नहुने भन्दै व्यावहारीकतामा नतिजा उत्कृष्ठ बनाउन योजना बनाएर लाग्नुपर्ने गैडाकोटका शिक्षक जगनाथ उपाध्यायले बताए।

शिक्षक तथा विद्यार्थीले किताबी ज्ञानले मात्र पर्याप्त नहुने हुनाले अतिरिक्त कार्यक्रम हुनु आवश्यक रहेको शिक्षा विकास तथा समन्वय इकाइ नवलपुरका प्रमुख दिपेन्द्र श्रेष्ठले बताए । हरेक तवरमा शिक्षा आवश्यक रहेता पनि बाहिरी ज्ञान छैन भने यसले व्यवहारमा उर्तान नसक्ने भन्दै किताव सगै अन्य ज्ञान, क्षमता र सीप आवश्यक रहने प्रमुख श्रेष्ठको भनाइ छ ।

जिल्ला समन्वय समिति नवलपुरका प्रमुख बाबुराम विश्वकर्माले शिक्षक र विद्यार्थी विचको सम्बन्ध लाई प्रगाढ बनाउन अतिरिक्त क्रियाकलापमा सगसगै गर्नुपर्ने बताउनु भयो । आफु बलेर अरुलाई उज्यालो छर्ने मैन जस्तो शिक्षक भएकाले विद्यार्थीको भावना अनुसार सिकाइ गराउनुपर्ने बताए । सामाजिक विकास कार्यालयले आयोजनामा भएको शिक्षक हाजिरीजवाफ, विद्यार्थी नृत्य भने १९ गते गरिने आयोजकले जनाएको छ