खोज

प्यूठान, ०५ मंसिर ।
प्यागोडा शैलीको बास्तुकला प्रयोग स्वर्गद्वारी मन्दिरको पूनः निर्माण गरिन थालिएको छ । स्वर्गद्वारी आश्रमका संस्थापक हंशानन्द गिरी अर्थात स्वर्गद्वारी महाप्रभुको समाधिस्थलमा सो मन्दिर निर्माण गर्न थालिएको हो । स्वर्गद्वारी आश्रमको लगानीमा आश्रम परिसरमा रहेको पुरानो मन्दिर भएको स्थानमा नयाँ मन्दिरको स्थापना गर्न थालिएको आश्रमका मुख्य कोठरी तामु प्रसाद न्यौपानेले जानकारी दिए । निर्माणका लागि सोमबार भूमि पूजा गरी शिलान्यास गरिएको हो । प्यागोडा शैलीमा निर्माण भएको पशुपतिनाथको मन्दिरको शैलीमा मन्दिरको निर्माण हुनेछ । जसका लागि डिपिआरको काम भइरहेकोमा करिब १२ देखि १५ करोडको लागत अनुमान गरिएको न्यौपानेले बताए । ‘केही डिजाइनहरू आएका छन् सोही अनुसार निर्माण थालेका हौं’ न्यौपानेले भने,‘भक्तपुरे इट्टा, सुर्कि चुना, काठको पिल्लरको मात्रै प्रयोग हुनेछ ।’ एक वर्ष भित्र निर्माण सक्ने गरी मिस्त्रिहरू तयार गरी शिलान्यास गरिएको हो ।

मन्दिर निर्माणका लागि आन्तरिक श्रोत तथा दाताहरू खोजिएको छ । १ लाख २५ हजार भन्दा बढी दान दिनेहरूको नाम शिलालेख लेख्ने, सो रकम भन्दा कमदिनेलाई रसिद दिने गरी भवन निर्माणार्थ सहयोग उठिरहेको छ । नेपाली प्यागोडाशैलीको मन्दिर, वास्तुकलाको सुन्दर नमुना, दुई तले छानो र चारैतर्फ मुख्य कलात्मक काष्ठद्वार, प्रत्येक टुंडाल र लकासीहरूमा भगवानका विभिन्न अवतार चित्राङ्कित काष्ठकलाको प्रयोग भएको मन्दिरको विशेषता हुनेछ । मन्दिरले स्वर्गद्वारीको महत्व थप बढ्ने विश्वास लिइएको न्यौपानेले बताए ।