खोज

बुटवल, २ मंसिर । रोटरी क्लब अफ बुटवल डाउनटाउनले गु्ल्मी, सत्यवती गाउपालिका–४ लिम्घाको सरस्वती माध्यमिक विद्यालयमा करीब साढे ३ लाख बराबरको विज्ञान अध्यापनमा उपयोगी शैक्षिक सामग्री वितरण गरेको छ । सामाजिक क्षेत्रमा बेग्लै पहिचान बनाएको क्लबबाट टिआरएफ चेयर शंकर ज्ञवालीको सहयोगमा कक्षा ११ र १२ मा अध्ययनरत विद्यार्थीहरुलाई उपयोगी हुने गरि साईन्स ह्युमन बडी पार्टस, स्मार्ट बोर्ड तथा डेक्सबेन्च वितरण गरिएको हो ।

एक समारोहका बिच आईतबार विद्यालय परिसरमा सत्यवती गाउपालिकाका अध्यक्ष टिकाराम पाण्डे, नेपाल चेम्बर अफ कमर्शका प्रदेश सदस्य युवराज न्यौपाने, रोटरी क्लब अफ बुटवल डाउनटाउनका अध्यक्ष शिव ज्ञवाली, क्लबका पुर्व अध्यक्ष टंक पराजुली, बिमल भट्टराई, भरत राना, टिआरएफ चेयर शंकर ज्ञवाली, प्रेसिडेन्ट नोमिनि धर्मदत्त ज्ञवालीले विद्यालय ब्यवस्थापन समितिका अध्यक्ष दल बहादुर खासु, विद्यालयका प्रधानाध्यापक मणि ज्ञवालीले सहयोग सामग्री हस्तान्तरण गरेका हुन ।

कार्यक्रममा सत्यवती गाउपालिकाका अध्यक्ष टिकाराम पाण्डेले संस्कारसहितको वैज्ञानिक शिक्षा आजको आवश्यकता भएको बताए । गाउपालिकाभित्रका विद्यालयमा यसलाई अनुसरण गर्ने गरि अघि बढाइएको उनले बताए । विद्यार्थीलाई अनुशासित र अतिरिक्त क्रियाकलापमा अग्रसर गराउन एनसिसि तालिम दिने नेपाल आर्मीसंग आग्रह समेत गरेर कार्यक्रम ल्याउन थालेको उनले बताए । साबिक लुम्बिनी अंचलको सबैभन्दा अग्लो स्थान २६९० मिटरमा थाप्लेको पहाड यही पर्ने भन्दै उनले यहा रहेको २५०० मिटर उचाईको पर्यटकिय गन्तव्य सत्यवती मन्दिर प्रख्यात रहेको बताए । नेपालको उत्कृष्ट एक सय पर्यटकिय स्थलमा गुल्मीको रेसुङा र सत्यवती पर्ने उनले बताए । हङकङको ओसनपार्कका रुपमा विकास गर्न सकिने हुदा यसमा संघ र प्रदेश सरकारबाट पहल जरुरी रहेको उनले बताए ।

कार्यक्रममा क्लबबाट टिआरएफ चेयर शंकर ज्ञवालीले आफ्नो गाउठाउको विकासमा थोरै भए पनि योगदान दिन पाउँदा खुशी लागेको बताए । जन्मभुमि स्वर्गभन्दा प्यारो लाग्ने हुदा पनि आफू यो ठाउलाई भुल्न नसकेको बताउदै उनले बाल्यकालमा अध्ययनको क्रममा धेरै समस्या र चुनौतीहरु पार गरेको स्मरण गरे । समयसापेक्ष विद्यार्थीहरुको उपयोग हुने गरि शैक्षिक र विज्ञानका सामाग्री हस्तान्तरण गरेको उनले बताए ।
यसैबिच ज्ञवालीले मातापिताको स्मृतिमा कालिदास–पवित्रा अक्षयकोष स्थापना गर्न ५० हजार रुपैया हस्तान्तरण गरेका छन । ज्ञवालीले देवि स्मृति अक्षयकोषमा १० हजार रुपैया, कल्याणकारी कोषमा समेत ११ हजार रुपैया सहयोग गरेका छन । यसअघि विद्यालयको शैक्षिक र भौतिक विकासको लागि आयोजना गरिएको महायज्ञमा समेत उनले १ लाख १२ हजार १११ रुपैया सहयोग गरेका थिए । कोषबाट गरिब तथा जेहेन्दार विद्यार्थीहरुको अध्ययनमा सहयोग हुनेमा आशाबादी रहेको बताए ।

कार्यक्रममा रोटरी क्लब अफ बुटवल डाउनटाउनका अध्यक्ष शिव ज्ञवालीले समय ब्यवस्थापन र नेतृत्व विकासमा क्लब विशेष जोड दिने बताए । यो पटक गाउपालिकामा ४ वटा कार्यक्रम ल्याएको उनले बताए । विज्ञान शिक्षा उपयोगी सामग्री हस्तान्तरण, गुल्मीको अग्लो पर्यटकिय स्थलमा क्लबको एक हजार औ नियमित बैठक, रुद्रबेणीको राम मन्दिरमा आश्रितहरुलाई खाद्यान्न र न्यानो कपडा वितरण गर्ने उनले बताए ।

कार्यक्रममा विद्यालयका प्रधानाध्यापक मणि ज्ञवालीले पुर्वाधार विकाससंगै गुणस्तरीय शिक्षामा जोड दिएको बताए । सरकार र समुदायका दाताहरुको सहयोगमा विद्यालयको धेरै आवश्यकता पूरा भएको उनले बताए ।

कार्यक्रममा सत्यवती गाउपालिका वडा नं ४ का वडाअध्यक्ष पिताम्बर ज्ञवाली, क्लबका पुर्व अध्यक्ष टंक पराजुली, बिमल भट्टराई, भरत राना, प्रेसिडेन्ट नोमिनि धर्मदत्त ज्ञवाली, सचिव कमल नेपाल, क्लब एडमिन चेयर प्रकाशराज पौडेल, पदम नेपाल, डिल्लीराज भण्डारीले धेरै दानबिरहरु जन्माएको लिम्घा विकासमा अघि बढ्न सफल भएको बताउदै आगामी दिनहरुमा पनि यसरी नै सहयोग हुनेमा आशाबादी रहेको बताए । हाल विद्यालयमा नर्सरी देखि १२ सम्म ३ सय विद्यार्थीहरु अध्ययनरत छन ।