खोज

बुटवल, ३० कार्तिक । दाङ—रुपन्देही सम्पर्क समाजमा आवद्ध सदस्यहरु बुटवलको राजमार्ग सरसफाई अभियानमा हातोमालो गरेका छन । बुटवल उपमहानगरपालिकाको ‘बुटवल उपमहानगरपालिका मुख्य राजमार्ग विशेष सफाई तथा हरियाली प्रवर्द्धन अभियान’ मा दाङ रुपन्देही सम्पर्क समाजका सदस्यहरुले शुक्रबार बिहान सरसफाईमा सहमभागी भए । बिहान सबेरै गोलपार्कदेखि लक्ष्मीनगर गेटसम्म आफनो पहिचानसहितको टिसर्टमा सजिएर बृहत् सरसफाई कार्यक्रममा सहभागिता जनाएको हो ।

कार्यक्रममा बुटवल उपमहानगरपालिकाका नगरप्रमुख खेलराज पाण्डेय, उपमेयर साबित्रादेवि अर्याल, वडा नं ४ का वडाअध्यक्ष नरिश्वर शर्मा सरसफाईमा सहभागी भएका थिए । कार्यक्रममा बोल्दै नगरप्रमुख पाण्डेयले नगरको सफाई सबै नगरबासीको जिम्मेवारी भएको बताए । पालिकाबाट सरसफाईको नीति बनाएर नै कडाइको साथ पालना गराउने तयारीमा रहेको भन्दै उनले यो अन्तिम चरणमा रहेको बताए । नगरको सफाईलाई प्रभावकारी बनाउन ५ सय देखि ५ हजारसम्मको जरिवाना समेत गर्ने उनले बताए ।

कार्यक्रममा समाजका अध्यक्ष रेशम बहादुर महराले बुटवललाई पर्यटकीय नगरको रुपमा विकास गरि आर्थिक समृद्धिको सम्भावना रहेको बताए । सरसफाईको क्रममा मुख्य सडकमा छोटा दुरिका बसहरु तथा स्थानिय पसलेहरुबाट फोहोर भैरहेको देखिएको भन्दै यसलाई रोक्न जरुरी रहेको बताए ।

समाजको पदाधिकारी, सदस्यहरुसहित सुरक्षा निकाय, स्थानिय टोलबासीहरु सरसफाईमा सहभागी रहेको कार्यक्रमका संयोजक मोहन यादवले बताए । समाजमा दाङबाट अस्थाई र स्थाई बसाई गर्दै रुपन्देहीमा विभिन्न पेशा, ब्यवसाय अप्नाउदै आएका सदस्यहरु आवद्ध रहेको समाजका महासचिव रमा सुवेदी डागीले बताईन ।