चारनम्बर, २६ कार्तिक ।
नेपाली कांग्रेस बाणगंगा नगर कार्यसमितिले पालिका संवाद कार्यक्रम सम्पन्न गरेको छ । उक्त कार्यक्रममा नेपाली कांग्रेस लुम्बिनी प्रदेश सभापति अम्बरसिंह पुन समक्ष पार्टीका कार्यकर्ताले प्रश्न र सुझाव राखेका थिए । उनीहरूले पार्टी आफ्नै बलमा चुनाव लड्नुपर्ने, पार्टीप्रतिको आक्रोस कम गर्ने कार्यक्रम ल्याउनुपर्ने, पार्टी सरकारमा हुँदा जनअपेक्षा अनुसार काम गर्न नसकेको, पार्टीको अन्तरिक द्वन्द्व व्यवस्थापन, भ्रष्टाचार, चुनावमा उम्मेदवार हुने अवसर लगायतका विषय उठान गरेका थिए ।
कार्यक्रममा उठेका विषयलाई सम्बोधन गर्दै नेपाली कांग्रेस लुम्बिनी प्रदेश सभापति अम्बरसिंह पुनले अब नेपाली कांग्रेस चुनावमा एक्लै जाने जिकिर गरे । उनले विगतमा केन्द्रको निर्देशन अनुसार आवश्यकताका आधारमा विभिन्न पार्टीसँग गठबन्धन गरिएको स्मरण गरे । उनले पार्टीप्रति ईमान्दार, योगदान गरेको र क्षमतावान कार्यकर्तालाई प्राथमिता दिई विभिन्न अवसर दिने गरेको दाबी गरे । उनले पार्टीभित्रको आन्तरिक द्वन्द्व व्यवस्थापन आजको आवश्यकता भएको बताए । उनले द्वन्द्व व्यवस्थापन भए आम चुनावमा बहुमत हासिल गर्न सहज हुने बताए । उनले कार्यकर्तालाई कांग्रेसलाई ८४ को चुनावबाट बहुमत दिलाउने गरि आजैबाट लाग्न निर्देशन दिए ।
नेपाली कांग्रेस बाणगंगाका सभापति विष्णु थापा, पार्टी प्रदेश महामन्त्री तथा पुर्वमन्त्री सुरेन्द्रराज आचार्य, पूर्वराजदुत दिपकुमार उपाध्याय, जिल्ला सभापति अब्दुल कलाम, प्रदेश सदस्य रुक बहादुर भुसाल, जिल्ला सचिव शक्ति सिंह ठकुरी लगायतको उपस्थिति रहेको थियो ।गोविन्द आचार्यको संचालनमा सम्पन्न कार्यक्रममा पार्टीका टोल समिति, वडा समिति, नगर समिति, प्रदेश समिति, महाधिवेशन महासमिति लगायत नगर भित्रबाट क्षेत्र, जिल्ला लुम्बिनी प्रदेश, केन्द्र तहसम्म प्रतिनिधित्व गर्ने सबै नेताहरू उल्लेख्य उपस्थिति रहेको थियो । नेपाली कांग्रेस लुम्बिनी प्रदेशका सभापति पुनले केही महिनायता कपिलवस्तुसहित प्रदेशका १२ वटै जिल्लाका प्रत्येक पालिकामा पुगेर ‘पालिका संवाद’ कार्यक्रम गर्दै आएका छन् ।
२८ कार्तिक २०८१, बुधबार
