खोज

प्यूठान, ०८ कार्तिक ।
लामो समय देखि अलपत्र पारिएको दम्तिको विद्युत सव स्टेशन तिहार अगावै सञ्चालन गर्ने तयारी गरिएको छ । मङ्गलवार खलङ्गामा भएको सर्वपक्षीय बैठकबाट सवस्टेशन तिहार अगावै सञ्चालन गर्नुपर्ने निष्कर्ष निकालेको प्रमुख जिल्ला अधिकारी रमा आचार्यले बताइन् । प्यूठान नगरपालिका–८ दम्तिमा निर्माण सम्झौताको सात वर्षसम्म सञ्चालनमा नआएको सवस्टेशनको निर्माण काम सम्पन्न गर्न निर्देशन दिइएको हो । नेपाल विद्युत प्राधिकरण, प्यूठान वितरण केन्द्रका अनुसार सवस्टेशनको काम ९० प्रतिशत सम्पन्न भएको छ । वितरण केन्द्र प्रमुख महेन्द्र दासले बुधबारबाट रुख काट्ने काम शुरु गरेको जानकारी दिए । ‘लाइन टाग्ने केही ठाउँमा विवाद थियो, अव अवरोध नभए ५ दिनमा सम्पन्न हुन्छ’ दासले भने । उनका अनुसार क्वाडी, विजुवार, बाग्दुला, दम्तिमा ३३ केभिए लाइनको ९० प्रतिशत, ११ केभिए लाइनको काम पनि ९० प्रतिशत सम्पन्न भएको हो ।

२०७४ जेठ १७ गते श्री त्रीपुरेश्वर जय दुर्गे जेभिले निर्माण जिम्मा लिएको उक्त काम ७ वर्षदेखि निर्माण सम्पन्न हुन सकेको छैन । पछिल्लो समय निर्माण कम्पनी सम्पर्कमा नआएपछि ठेक्का तोडेर सवस्टेशन सञ्चालनको लागि अघि बढ्न विद्युत् प्राधिकरणले तयारी गरेको हो ।

५ करोड ३६ लाख ६० हजार ६ सय ८२ मा ठेक्का सम्झौता गरेको निर्माण कम्पनीले विभिन्न बहाना देखाउँदै निर्माण कार्य अलपत्र छोडेपछि मङ्गलवार सर्वपक्षीय बैठक बसेको थियो । जिल्ला समन्वय समिति प्यूठानका प्रमुख धरम बहादुर जि.सिको अध्यक्षतामा भएको बैठकमा लुम्बिनी प्रदेशका सांसद तुल्सीराम शर्मा, धनलक्ष्मी श्रेष्ठ, जिल्लाका स्थानीय तहका प्रमुख तथा उपप्रमुख, विभिन्न राजनीतिक दलका नेता लगायत सरोकारवालाको सहभागिता थियो । सवस्टेशन सञ्चालनसँगै अहिले अनियमित भइरहेको विद्युतको नियमित आपूर्तिका लागि सहजता हुनेछ ।