खोज

लमही,२५ साउन ।
दाङको राप्ती गाउँपालिकाका भालुवाङ र पाखापानी बजारका अधिकांस पसल मापदण्ड विपरित भएको पाइएको छ ।
खाद्य प्रविधि तथा गुण नियन्त्रण डिभिजन कार्यालय तुलसीपुर दाङको सहकार्यमा ती बजारको अनुगमन गर्दा अधिकांस पसल मापदण्ड विपरित सञ्चालन भएको पाइएको हो ।

२ दिनको अनुगमनको क्रममा भालुवाङ पुल्चोक बजार र पाखापानी बजार क्षेत्रका कुल ४६ वटा पसलको अनुगमन गरेको छ । जसमा ३६ वटा होटल, ३ वटा मासु पसल, १ वटा बथ स्थल, ४ वटा किराना पसल र १ वटा डेरी, १ वटा कोल्डड्रिङ गरि ४६ वटा पसलहरूको अनुगमन गरेको छ ।

पछिल्लो समय देशका विभिन्न जिल्लामा हैजा, झाडापखाला, डेंगी लगायतका रोगको संक्रमण फैलिरहेको र होटल, मासु पसल, बथ स्थल, डेरी, गल्ला तथा किरानाहरूमा हुने अखाद्य वस्तुहरूको प्रयोगले मानव स्वास्थ्यमा असर गर्नुका साथै सेवाग्राहीहरू ठगिने समस्यालाई मध्यनजर गरी बजार अनुगमन थालिएको बजार अनुगमन समितिका सदस्य तथा आर्थिक विकास समितिका संयोजक दामोदर आचार्यले जानकारी दिए । अनुगमनको क्रममा अधिकांश होटलहरूमा खाने तेलको गुणस्तरमा ह्रास देखिएको छ भने अखाद्य वस्तु फेला परेको खाद्य प्रविधि तथा गुण नियन्त्रण डिभिजन कार्यालय तुलसीपुरका खाद्य निरिक्षक सुर्दशन गोसाईले जानकारी दिए । त्यसै गरि फुट कलर हालेको, म्याद नाघेका सामानहरू फेला परेको र सरसफाईमा कमी देखिएको खाद्य निरिक्षक गोसाईले बताए । फेला परेका अखाद्य वस्तुहरूको तत्कालै नस्ट गरिएको छ भने त्यस्ता बस्तु भेटिएका पसलका सञ्चाकहरूलाई पहिलो पटकका लागि सचेत गराइएको खाद्य निरिक्षक गोसाईले जानकारी दिए ।

गाउँपालिकाकी उपाध्यक्ष तथा अनुगमन समितिकी संयोजक कमलापती चौधरीको नेतृत्वमा खटिएको अनुगमन टोलीमा गाउँपालिकाका कर्मचारी, खाद्य प्रविधि तथा गुण नियन्त्रण डिभिजन कार्यालय तुलसीपुरका खाद्य निरीक्षकहरू, इलाका प्रहरीकार्यालय भालुवाङका प्रहरी, स्वास्थ्यकर्मी र पत्रकार लगायतको सहभागीता रहेको थियो । अनुगमन अझै केही दिन सम्म सञ्चालन हुने गाउँपालिकाले बताएको छ ।