खोज

बुटवल, २५ साउन ।

दुर्घटनामा परी निधन भएका आफ्ना शेयर सदस्यको परिवारलाई बिमा रकम वापत १७ लाख रुपैयाँ प्रदान गरिएको छ । पश्चिम नेपाल बस ब्यबसायी प्रा.लि.द्वारा शेयर सदस्य लु १ ख ८७८७ नम्बरका गाडी धनी भैरहवा निवासी जानकी देवी पाण्डेको परिवारलाई सो रकम प्रदान गरिएको हो । बिहीबार एक कार्यक्रका बिच मृतक पाण्डेका छोराहरु अखिलेश कुमार पाण्डे र कमलेश कुमार पाण्डेलाई उक्त रकम हस्तान्तरण गरिएको थियो ।

यति ठुलो रकम राहत वापत ब्यवसायीको परिवारलाई प्रदान गरिएको पहिलो पटक भएको प्रा.लि.ले जनाएको छ । आफ्नै घरको छतबाट खसेर गम्भीर घाईते भएकी सिद्धार्थनगर ३ भैरहवा निवासी पाण्डेको उपचारका क्रममा युनिभर्सल मेडिकल कलेजमा निधन भएको थियो । पश्चिम नेपाल बस ब्यबसायी प्रा.लि.का शेयर सदस्य समेत रहेकी पाण्डेको निधन पश्चात मृतकका परिवारलाई ब्यवसायी कल्याणकारी कोष मार्फत २ लाख रुपैयाँ र बिमा वापतको १५ लाख गरी कुल १७ लाख रुपैयाँ प्रदान गरिएको अध्यक्ष दधिराम खरेलले बताएका छन् ।

अध्यक्ष खरेलका अनुसार कुल २२ सय २ शेयर सदस्य रहेको प्रा.लि.ले ब्यवसायीको निधन पछि परिवारलाई राहत होस भन्ने उद्देश्यले ब्यवसायीहरुको २२ लाखसम्मको बिमा तथा राहत रकमको ब्यवस्था संस्थाले नै गरेको छ । अध्यक्ष खरेल भन्छन—पश्चिम नेपाल बस ब्यबसायी प्रा.लि.ले स्थापना गरेको सहकारी मार्फत आफ्ना शेयर सदस्यहरुको ब्यावसायिक सुरक्षा र सदस्यका परिवारहरुको हकहितका लागि आर्थिक सहयोग गर्ने उद्देश्यले बिशेष ब्यवस्था गरेको छ ।

आफ्ना सदस्य ब्यवसायीहरुको पेशागत सम्मान र हकहित संरक्षणलाई मुख्य प्राथमिकतामा राख्दै पश्चिम नेपाल बस ब्यवसायी प्रा.लि.ले पछिल्लो समय मरणोपरान्त समेत परिवारलाई रकम प्रदान गर्दै आईरहेको छ । ब्यवसायीका साथै परिवारको जिवनयापनमा समेत सघाउ पुर्याउने उद्देश्यले सहकारी मार्फत रकम वितरण गर्ने ब्यबस्थगा गरिएको प्रवन्ध संचालक रामचन्द्र भुसालले बताए ।