खोज

बुटवल, २१ साउन ।

सैनामैनाको एक विद्यालयका कम्युटर शिक्षक कमल भण्डारीले नाबालक विद्यार्थीमाथि निघाएत कुटपिट गरेका छन् ।

सैनामैना नगरपालिका वडा नं.१ स्थित उक्त विद्यालयका शिक्षक भण्डारीले नाबालक विधान खनालमाथि कुटपिट गरेका हुन् । सैनामैना वडा नं.२ बस्ने वर्ष ११ का खनाल सोही विद्यालयको कक्षा ७ मा अध्ययन गर्ने छात्र हुन् ।

शुक्रबार विहान १० बजे अध्ययनका लागि स्कुल गएका विधान पिटाई खाएर रुँदै घर फर्किएका हुन् । विद्यालयका कम्युटर शिक्षक भण्डारीले नाबालक विद्यार्थी विधान खनालको खुट्टाको साप्रोमा निल डाम् हुने गरी प्लाष्टिकको पाईपले २५ पटक पिटेको विद्यार्थीले बताएका छन् । साथै, विधानको शरीरका अन्य अंगमा पनि निल डाम रहेको छ । उनको साप्रो सुनिएको छ ।

पीडितको आमा राधा खनालले न्याय माग्दै मिडियामा आएर हदै सम्मको कार्वाहीको माग गरेकी छन् । उनी भन्छिन्, “विद्यालयमा शिक्षा लिन मैले पठाएकी थिएँ, तर छोरो स्कुलबाट पिटाई खाएर आयो, त्यो विद्यालयमा पढाई हुन्छ कि पिटाई हुन्छ ? निर्घात कुटपिट विरुद्ध कानुनी कार्बाही अघि बढाउने पीडितले उल्लेख गरिन् ।

विद्यार्थीलाई कुटपिट गर्न नपाईने सैनामैना नगरपालिका शिक्षा शाखा प्रमुख राधा बञ्जाडेले बताईन् । घटनाबारे थप सोधपुछ गरी कार्वाहीको लागि प्रक्रिया अघि बढाउने बञ्जाडेले उल्लेख गरिन् ।

घटनाको विषयलाई लिएर पीडितको उजुरी आए तत्काल नियन्त्रणमा लिई प्रक्रिया अघि बढाउने जिल्ला प्रहरी कार्यालय रुपन्देहीको प्रहरी उपरीक्षक रञ्जित सिंह राठौरले जानकारी दिए । उजुरी परेसंगै घट्नाबारे अनुसन्धान हुन्छ र कानुनी उपचार हुने एसपी राठौरको भनाई छ । बालबालिका सम्बन्धी ऐन २०७५ को दफा ६६ अन्तर्गतको कसुरमा १ वर्षसम्म कैद र ५० हजार रुपैयाँ जरिवाना हुने कानूनी व्यवस्था रहेको छ ।

यता, विद्यालयका प्रधानाध्यापक नेत्रलाल पुरीले कुटपिट भएको बारे आफूले पनि जानकारी पाइसकेको भन्दै विद्यालय व्यवस्थापन समितिको बैठक बसेर आवश्यक निर्णय लिइने बताए । शिक्षक भण्डारी सैनामैना नमुना माविमा निजी स्रोतका रुपमा कार्यरत छन् ।