खोज

बुटवल, १ कात्तिक ।

“एकताबद्ध देश, खेलकुदको सन्देश“ नाराका साथ असोज २८ गते देखि गण्डकी प्रदेशमा शुरु भएको नवौँ राष्ट्रिय खेलकुद प्रतियोगिता २०७९ अन्तर्गत आइतबार १७ औं राष्ट्रिय शारीरिक सुगठन प्रतियोगिताका खेलहरु सम्पन्न भएका छन् । नेपाल आर्मीले प्रतियोगितामा ५ स्वर्णसहित कुल ५९ अंक ल्याएर टिम च्याम्पियनसिप ट्रफी हात परेको छ ।

सोमबार संचालन भएको पुरुष शारीरिक सुगठन खेलको ८० किलो तौल समूहमा विभागीय टोली नेपाल आर्मीका ललित धिमालले स्वर्ण पदक जिते । सोही तौल समुहमा सशस्त्र प्रहरी बलका राकेश श्रेष्ठले रजत र नेपाल प्रहरीका रत्न सुन्दर ङाकुशीले कास्य पदक हात पारे । त्यसैगरी ८० किलोभन्दा माथिको तौल समूहमा नेपाल आर्मीकै उमेश राइले स्वर्ण, लुम्बिनी प्रदेशका बिष्णु निसादले रजत र सशस्त्र प्रहरी बलका आदित्य ठाकुरले काँस्य पदकमा चित्त बुझाए ।

पुरुष फिजिक्स बिधा तर्फ १७० सेमी तलको समूहमा गण्डकी प्रदेशका प्रदिप रेग्मीले स्वर्ण जितेका छन् । नेपाल पुलिस क्लबका सुकदेव कार्कीले प्रतियोगितामा रजत तथा सशस्त्र प्रहरी बलका किरण सुवालले कांस्य पदक प्राप्त गरे । यसैगरी प्रतियोगिता अन्तर्गत १७० सेमी माथिको समूहमा प्रदेश नं. १ का अवतार श्रेष्ठले स्वर्ण पदक जित्दा सशस्त्र प्रहरी बलका निहाल जोशीले रजत र नेपाल प्रहरी क्लबका सुरज डंगोलले काँस्य पदक जिते ।

पहिलो पटक राष्ट्रिय खेलकुदमा समावेश गरिएको महिला खुला शारीरिक सुगठनमा सशस्त्र प्रहरी बलका पुजा श्रेष्ठले स्वर्ण पदक जित्दै गर्दा नेपाल आर्मीकी ज्याश्मिन लामा रजत र प्रदेश नं. १ की रजनी श्रेष्ठले काँस्य पदक हात पारिन् । महिला विधा तर्फकै मोडल फिजिक्समा नेपाल आर्मीकी श्वेता कपाली स्वर्ण, बाग्मती प्रदेशकी रोजिना ख्यामाली रजत तथा नेपाल पुलिस क्लबकी सनम मुलगुठी काँस्य पदक जित्न सफल भइन् ।

शारीरिक सुगठन खेल संयोजक शिवलाल श्रेष्ठको अध्यक्षतामा भएको प्रतियोगिताको नेपाल शारीरिक सुगठन संधका उपाध्यक्ष दिनेश राजभण्डारीलेले संचालन गरेका थिए । उक्त कार्यक्रम पोखरा सभागृहमा संचालन भएको थियो । शनिबार संचालन गरिएको प्रतियोगितामा ५५ किलो तौल समूहमा बलामी प्रथम भए भने नेपाल आर्मीका किशन दास दिवाकरले रजत तथा लुम्बिनी प्रदेशका सुनिल आलेले कांस्य पदक हात पारे ।

६५ किलो तौल समूहमा गण्डकीका असिम गुरुङले स्वर्ण जिते भने लुम्बिनीका नबराज डुम्रेले रजत तथा सुदुर पश्चिमाञ्चलका सुनिल चन्दले कांस्य पदकमा चित्त बुझाए । यसैगरी ७० किलो तौल समूहमा विजेता नेपाल आर्मीका प्रज्वलमान शाक्य प्रथम, मधेश प्रदेशका किरण यादव दोश्रो तथा लुम्बिनी प्रदेशका बिजेन्द्रमान श्रेष्ठ तृतीय बने । ७५ किलो तौल समूहमा त्रिभुवन आर्मीका नरेश मालाकारले स्वर्ण जिते भने मधेश प्रदेशका सन्नि आजम रजत तथा बाग्मती प्रदेशका योगेश शाही कास्यमा चित्त बुझाए ।

प्रथम, दोश्रो र तेस्रो हुने खेलाडीले मेडल, प्रमाणपत्र प्राप्त गरे भने प्रथम हुने खेलाडीले २५ हजार नगद समेत प्राप्त गरे । पुरस्कृत खेलाडीलाई नेपाल शारीरिक सुगठन तथा फिटनेस संधका अध्यक्ष राजेशबाबु श्रेष्ठ, एनबिबिएफएका उपाध्यक्ष दिनेश राजभण्डारी, महासचिव राजन श्रेष्ठ तथा रुपन्देही जिल्ला शारीरिक सुगठन संघका अध्यक्ष सितु प्रसाद श्रेष्ठ, कपिलवस्तु जिल्ला अध्यक्ष जीवन गिरी, भक्तपुर जिल्ला संध अध्यक्ष बाबुकाजी शाक्य, कास्की जिल्ला संध अध्यक्ष शंकरमान उदास तथा एनएफबिएफ कास्की जिल्ला संघका अध्यक्ष राकेश जोशीले पुरस्कार प्रदान गरेका थिए । प्रतियोगितामा सात प्रदेश तथा तीन बिभागीय टोलीबाट ११ वटा इभेन्टमा ९४ जना खेलाडीहरुको सहभागिता रहेको रुपन्देही जिल्ला शारीरिक सुगठन संघका अध्यक्ष सितु प्रसाद श्रेष्ठले बताए ।