खोज

वि. सं.२०७५ माघमा बुटवल नारायणगढ सडक बिस्तारको लागि सम्झौता भएर काम सुरु गरिएको सडकको भौतिक प्रगति हालसम्म ५२ प्रतिशतमात्रै छ । ११४ किलोमिटर सडक बनाउन ६ बर्ष लाग्दा पनि सम्पन्न नहुनुका पछि निर्माण कम्पनीको गंभीर लापरवाही हो । निर्माण कम्पनीले अझ डेढ वर्ष म्याद थपका लागि निवेदन दिएको छ । पूर्व पश्चिम राजमार्गको नारायणगढ–बुटवल सडक विस्तार योजनाको दोस्रोपटक थपिएको म्याद आउँदो साउन ८ गते सकिँदै छ । हालसम्म नवलपरासी पूर्वी खण्डमा ५२ प्रतिशत काम सम्पन्न भएको छ । अहिले बर्षाको समय छ र उक्त सडक खण्ड भएर यात्रा गर्नेहरूले निकै सास्ती पाएका छन । निरन्तर परेको वर्षाको कारण नारायणगढ बुटवल सडक खण्ड विस्तारको काम ठप्प भएको छ । समयमै सडक नबनाउने निर्माण कम्पनीको म्याद पटक पटक थप्ने र कम्पनीलाई कारवाहीको साटो उल्टो म्याद थपेर पुरस्कृत गर्ने काम भएकै कारण समस्या झनै बल्झिदै गएको छ । यस प्रकारका कामले निर्माण पक्षको मनोबल झनै बढेको अवस्था छ । समयमै सडक विस्तारको काम नसकेको निर्माण कम्पनी चाइना स्टेट इन्जिनीयरिङ कर्पोरेसन लिमिटेडले दोस्रो पटक पाएको म्याद थपको अवधि यही साउन ८ गते सकिँदैछ । म्याद सकिन लागेपछि निर्माण कम्पनीले अझ एक वर्ष म्याद थपका लागि निवेदन दिएको छ । अहिले म्याद थपका लागि समयमै काम सम्पन्न हुन नसक्नुका पछिको कारण देखाउँदै निर्माण पक्ष संघीय राजधानी काठमाण्डौं धाउँदै छ । सडक निर्माणको काम समयमै सम्पन्न गर्नुपर्नेमा म्याद थपका लागि दौडधुप गर्नु निश्चय नै सुहाउने कुरा होइन । पूर्व पश्चिम नेपाललाई जोड्ने यो सडक नेपालकै महत्वपूर्ण सडक खण्ड हो । निर्माण पक्षको लापरवाहीका कारण अहिले सडक विस्तारको क्रममा यात्रुले सास्ती पाएका छन् ।

घण्टौं जाममा बस्नुपर्ने बाध्यता खेप्दै आएका यात्रुहरू समयमा नै सडक निर्माण कार्य नसकिँदा दिक्क छन् । कुनैपनि विकास निर्माणको काम समयमा नै सम्पन्न नहुने ठूलो समस्याको रूपमा रहेको यो सडक गतिलो उदाहरण छ । जुन गतिमा निर्माण कार्य हुनुपर्ने हो त्यो नहुँदा यात्रीले सास्ती पाउने स्वाभाविक हो । सवारी आवागमन नै रोकेर गरिएको काम सुस्त गतिमा अगडि बढेको छ । सडक विस्तार आयोजनाको हेलचेक्र्याइँ र लापरबाहीको कारण यात्रुले ज्यान नै गुमाउने अवस्था सृजना भएको छ । सडक निर्माणको क्रममा सरकारी अनुगमन पनि सुस्त छ । जोखिमयुक्त स्थानमा सचेतना चिह्न नराख्नु दुर्घटनाको कारण बनेको छ । यो सडकका कारण हजारौं यात्रुले सास्ती खेप्दै आएका छन् । अहिले वर्षाको समय भएकोले सडकको अवस्थाका बिषयमा यात्रुलाई समयमै सूचना दिनु जरूरी छ । बर्षाको यो समयमा सावधानी अपनाउनुको अर्को विकल्प छैन । आयोजनाले जोखिम कम गर्नको लागि सडक विस्तार भइरहेका स्थानमा झर्न लागेका ढिस्का झारेर सडकलाई कम जोखिमयुक्त बनाउनुपर्छ । जति धेरै निर्माण कार्यमा ढिलाइ भयो त्यति नै धेरै जोखम हुने देखिन्छ । दैनिक १० हजारको हाराहारीमा यस सडकमा सवारीसाधन आवतजावत गर्ने भएकाले पनि समयमा नै काम सम्पन्न गर्नु र यात्रुहरूको आवागमनलाई सहज बनाउनु सम्वन्धित निकायको दायित्व एवं कर्तव्य हो । म्याद सकिनै लाग्दा आयोजनाले उक्त सडक खण्डमा भएका खाल्डाखुल्डी पुर्ने, वर्षातले बाटो चिप्लो भएको ठाउँमा गिट्टी राख्ने, पहिरो हटाउने लगायतको काम गरेको छ । पाँच बर्षसम्म सडक निर्माणको काममा बेवास्ता गर्ने र पटक पटक म्याद थप्न लबिङ्ग गर्ने काम अव सैह्य हुन सक्दैन् । बुटवल नारायणगढ सडकको बिषयमा अव कसैलाई कुनैपनि प्रकारको सन्देह छैन । समयमै सकिनुपर्ने काम ढिलाई भएर हजारौं यात्रुले सास्ती पाउँदा पनि फेरीपनि म्याद थपका लागि धाउने प्रवृत्ति घातक छ । तसर्थ सरकारले यो बिषयमा अव गंभीर ढंगले निर्णय गरोस् ।