खोज

चन्द्रौटा(कपिलवस्तु), १० असार ।

कपिलवस्तुको शिवराज नगरपालिकाका प्रमुख अजय थापाले स्थानीय साधन स्रोत, सीप प्रयोग हुने एवं तत्काल रोजगारी सिर्जना गर्ने आयोजना ल्याएको बताएका छन् । आइतबार आयोजना गरेको १५ औँ नगर सभालाई सम्बोधन गर्दै उनले यस्तो बताएका हुन् ।

सार्वजनिक खर्चमा पारदर्शिता, मितव्ययिता र उत्तरदायित्व पालना गराउँदै वित्तीय अनुशासन र सुशासन कायम गर्ने, नगरवासीको न्यूनतम आधारभूत आवश्यकताहरूको परिपूर्ति गर्ने, कृषिको व्यवसायीकरण र पर्यटन विकासलाई जोड दिएको उनले बताए । चालु वर्षका अधुरा आयोजनालाई सम्पन्न गर्न प्राथमिकतामा बजेट विनियोजन भएको मेयर थापाले बताए । यस योजनामा शिक्षालाई प्राथामिकता दिएको उनको भनाई छ ।

नगर सभा अन्तर्गत नीति तथा कार्यक्रम नगरप्रमुख अजय थापा र बजेट उपप्रमुख शिवकुमारी थारुले प्रस्तुत गरेका हुन् । चालु वर्षको तुलनामा २ करोड २८ लाख कमी बजेट आएको छ । सभामा उपप्रमुख थारुले आगामी आर्थिक वर्षका लागि १ अर्ब २४ करोड ७९ लाख ५६ हजार बराबरको आय–व्यय प्रस्तुत गरेकी छन् ।

आगामी आर्थिक वर्ष २०८१÷८२ को लागि वडा स्तरीय योजनामा १० करोड, नगर स्तरीय योजनामा १० करोड, सामाजिक विकास तर्फ ५५ लाख, शिक्षा युवा खेलकुद तर्फ ८ करोड ३५ लाख, स्वास्थ्य शाखा तर्फ ३ करोड ५० लाख,कृषि विकास तर्फ १ करोड,पशु विकास तर्फ ५० लाख विनियोजन गरिएको छ । नगरभित्रका उद्यम गर्न चाहानेलाई ऋण उपलब्ध गराउने नीति तथा कार्यक्रममा समावेश गरिएको उल्लेख छ । गत वर्ष हुन नसकेको महुवा प्रवद्र्धन कार्यक्रम यस वर्ष पनि नीति तथा कार्यक्रममा समेत समावेश गरिएको छ ।

आगामी वर्ष २०८१÷८२ को वार्षिक नीति तथा कार्यक्रम मेयर रोजगार कार्यक्रम, पढ्दै कमाउँदै कार्यक्रम, उच्च शिक्षा अध्ययनरत विद्यार्थीलाई मेयर उपमेयर छात्रवृत्ति वितरण, नगरभित्रका चोकमा सिसिटिभी क्यामरा लगायतका कार्यक्रम समेत समावेश गरिएको छ । पशु बिरामी भएको खण्डमा अनकलको सेवा सुरु गर्ने भएको छ । थाकलका सामग्री बनाउन नगरपालिकाले ढाइ लाख बजेट विनियोजन गरिएको छ । नगरपालिकाभित्र यो आर्थिक वर्षमा ७.५ किमि सडक कालोपत्रे तथा मर्मत भएको जनाइएको छ । नगरपालिकाका अनुसार वर्ष नगरपालिकाभित्र कुल १७ किमि सडक ग्राभेल भएको छ ।

करिब २ करोड लागतमा जवइ सिंचाइ आयोजना निर्माणाधिन रहेको छ । १५ सैयाको शिवराज आधारभुत अस्पतालको लागि जग्गा प्राप्ति भइ निर्माणको चरणमा छ । सभाले शिवराज नगरपालिका–५ का वडा अध्यक्ष नेत्र बेल्बासेलाई सम्मान गरिएको छ । उत्कृष्ट कर्मचारी लेखा अधिकृत, कृषि विकास अधिकृत, पशु विकास अधिकृतहरुलाई समेत सम्मान गरिएको शिवराज नगरपालिकाका प्रशासकीय अधिकृत बाबुराम पौडेलले जानकारी दिए ।