© २०२३
पाल्पा, ७ असार ।
तानसेन नगरपालिकाले आर्थिक बर्ष २०८१÷८२ को लागि १ अर्ब ७३ करोड ७६ लाख २० हजार ९५७ रुपियाँको बार्षिक बजेट सार्वजनिक गरेको छ ।
शुक्रबार १५ औं नगर सभाको पहिलो बैठकमा तानसेन नगरपालिकाकी उप प्रमुख प्रतीक्षा सिंजालीले उक्त अनुमानित बजेट नगरसभामा प्रस्तुत गरिन् । जसमा आगामी आर्थिक बर्षको लागि वित्तिय ब्यवस्था समेत चालू तर्फ ८४ करोड ७७ लाख ७ हजार ५ सय ७५ रुपैयाँ छ । पुँजीगत खर्च तर्फ ९१ करोड ९९ लाख १३ हजार ३ सय ८२ रहेको छ ।
नगरपालिकाको आर्थिक विकास क्षेत्र ६ करोड २ लाख ४६ हजार १३९ रुपैयाँ, भौतिक पूर्वाधार विकास तर्फ ८३ करोड ८१ लाख ९२ हजार ४५३ रुपैयाँ, त्यस्तै सामाजिक विकासतर्फ ६९ करोड ३७ लाख ५९ हजार ४७२ रुपैयाँ रहेको छ । सुशासन तथा संस्थागत विकास तर्फ १४ करोड ८८ लाख ३७ हजार ७०२ रुपैयाँ बिनियोजन भएको छ । त्यस्तैगरी वातावरण तथा विपत ब्यवस्थापन तर्फ २ करोड ६५ लाख ८५ हजार १८९ रहेको उपप्रमुख सिंजालीले जानकारी गराईन् ।
नगरसभाका अध्यक्ष नगरप्रमुख सन्तोषलाल श्रेष्ठले तानसेन नगरपालिकाको आर्थिक बर्ष २०८१÷८२ को बार्षिक नीति तथा कार्यक्रम प्रस्तुत गरेका थिए । नगर प्रमुख श्रेष्ठले यस आर्थिक बर्षमा साढे ३ किमी सडक कालोपत्रे तथा ढलान, साढे ९ किमि सडक स्तरउन्नती तथा मर्मत, ३ दशमलव २ किमी सडक नयाँ सडक निर्माण कार्य सम्पन्न भएको जानकारी गराए । त्यस्तै यो अवधिमा २७ वटा भवनमा ट्रस्ट निर्माण, ७ वटा मन्दिरमा १२ वटा प्रतिक्षालय निर्माण, २८ वटा खानेपानी टंकी निर्माण तथा मर्मत, २ दशमलव ५ किमी सिंचाई कुलो निर्माण तथा मर्मत भएका छन् ।
नगरपालिकाको आर्थिक विधेयक २०८१ आर्थिक समितिका संयोजक हेमन्तराज शाक्यले प्रस्तुत गरे । त्यस्तै तानसेन नगरपालिकाको बिनियोजन विधेयक उपप्रमुख प्रतीक्षा सिंजालीले प्रस्तुत गरिन् ।
तानसेन नगर प्रज्ञा प्रतिष्ठान विधेयक महेश्वर श्रेष्ठले प्रस्तुत गरे । लैङ्गिक समानता अपाङ्ग तथा सामाजिक समावेशिकरण विधेयक पनि महेश्वर श्रेष्ठले नगरसभामा प्रस्तुत गरका थिए । न्यायिक समितिको प्रतिवेदन उपप्रमुख प्रतीक्षा सिंजालीले प्रस्तुत गरिन् । सबै विधेयकमाथि छ्लफल आगामी दोस्रो बैठक असार २८ गते हुने नगर प्रमुख श्रेष्ठले जानकारी दिए ।