खोज

बुटवल, २३ जेठ । काठमाण्डौमा जारी पिएम कप एनभिए वुमन/मेन्स भलिबल लिग २०८१ मा मोफसलको एभरेष्ट भलिबल क्लब उपाधि दाउमा छ । यसअघि सम्पन्न आठौँ पुरुष तथा महिला भलिबल च्याम्पियनसिपमा विजेता बन्दै लिगमा सहभागिता जनाएको एभरेष्ट ३ खेलमा अपराजित हुदै अंक तालिकाको शिर्षस्थानमा रहेको छ ।

त्रिपुरेश्वरमा रहेको राष्ट्रिय खेलकुद परिषद् (राखेप) को कभर्ड हलमा मंगलबार भएको तेस्रो खेलमा चन्द्रागिरी नगरपालिका न्यु डायमण्डलाई ३—० को सोझो सेटमा पराजित गर्दै एभरेष्ट शिर्षस्थानमा कायम रहेको हो । पहिलो खेलमा कर्णाली खेलकुद विकास परिषद र दोस्रो खेलमा विभागिय त्रिभुवन आर्मी क्लबलाई एभरेष्टले पराजित गरेको हो । लिगमा अब एभरेष्टले दुई खेल खेल्न बाकी छ । एभरेष्टले विहिबार विभागिय टिम एपीएफ क्लब र शुक्रबार नेपाल पुलिस क्लबसंग सामना गर्ने छ ।

नेपालको राष्ट्रिय टिमको क्याप्टेन अरुणा शाहीसहित भारतिय टिमका ३ खेलाडीको साथ मैदानमा उत्रेको एभरेष्ट उपाधि दाबेदारको रुपमा हेरिएको छ । भारतको राष्ट्रिय टिमका ३ जना खेलाडीहरु सालिनी साराभान, सुर्या एस, केपि अनुश्रीसहित युवा खेलाडीहरु निशा चौधरी, आरती चौधरी, अनुषा चौधरी, मिना सुनार, हस्ती थारु, यमकली कवर (मगर), रितु पुन, मिना केसी छन । टिमका मुख्य प्रशिक्षक अर्जुन घिमिरेले अनुभवी र युवा खेलाडी टिममा रहेका कारण उपाधिमा दाबेदारी रहेको बताए । लगातार जितसंगै टिममा मनोबल उच्च बनेको उनले बताए । मोफसलबाट प्रतिनिधित्व गरेर राम्रो नतिजा ल्याउन सफल भएको उनले बताए । टिम राम्रो बनाउन धेरै मेहनत भएको ब्यवस्थापक मुकेश कुवरले बताए ।

एभरेष्ट भलिबल क्लब, नेपाल पुलिस क्लब, नेपाल एपीएफ क्लब, चन्द्रागिरी नगरपालिका न्यु डायमण्ड, त्रिभुवन आर्मी क्लब र कर्णाली खेलकुद विकास परिषद गरि ६ टिमले प्रतिस्प्रर्धा गर्दैछन । प्रतियोगितामा पुरुष र महिला दुवैतर्फको विजेताले आठ लाख, उपविजेताले चार लाख र तेस्रो हुने टिमले नगद दुई लाख रुपैयाँ पाउने छन् ।