© २०२३
सल्यान, ३० वैशाख ।
जनप्रतिनिधिलाई लक्षित गरेर शनिबार सल्यानको भोटेचौरमा तनाव व्यवस्थापन तालिम सप्पन्न भएको छ । छत्रेश्वरी गाउँपालिकाको आयोजना र मानसिक स्वास्थ्य तथा परामर्श केन्द्र (सिएमसी) नेपालको प्राविधिक सहयोगमा कार्यपालिका सदस्यहरु तथा अन्य सहभागीलाई तनाव व्यवस्थापन तालिम प्रदान गरिएको हो ।
तनाव सकारात्मक र नकारात्मक दुई किसिमको हुने भन्दै तालिममा तनावको पहिचान, असर, रोकथाम र सामना कसरी गर्ने भन्ने बारेमा अभिमुखिकरण तथा कृयाकलाप संचालन गरिएको थियो । मनोविद् आरती गुरुङ र सिएमसी नेपालका प्रादेशिक कार्यक्रम अधिकृत अनन्त चौधरीले तनावका कारक तत्वहरु, यसले पार्ने असर तथा तनाव कम गर्ने उपायहरुका बारे प्रशिक्षण दिएका थिए ।
कार्यक्रममा गाउँपालिकाका अध्यक्ष ओज बहादुर बुढाथोकी, उपाध्यक्ष बुद्ध कुमारी खत्री, वडा अध्यक्ष तथा कार्यपालिका सदस्यहरु लगायतको सहभागिता रहेको थियो । सबैमा तनाव निराकरण गर्न सकिन्छ भन्ने भावना उत्पन्न गराउन जरुरी रहेकोमा जोड दिदै तालिममा परिवारभित्रको, अन्तर सम्बन्धको, कार्यस्थलको तथा अन्य सामाजिक, आर्थिक, राजनीतिक क्षेत्रमा हुने तनावलाई व्यवस्थापन गर्न सकिन्छ वा त्यसको असर आफूमा कम भन्दा कम गर्ने अवस्था बनाउन सकिन्छ भन्ने विषयमा प्रशिक्षण गरिएको थियो ।
तालिम समापन गर्दै गाउँपालिका उपाध्यक्ष खत्रीले मानव जीवनमा जोकोहीलाई पनि तनाव हुने भन्दै यसलाई सकारात्मक रुपले सामना गर्दै अघि बढ्नुपर्ने बताइन् । आइतबार गाउँपालिकामा कार्यरत कर्मचारीका लागि तनाव व्यवस्थापन तालिम सञ्चालन हुने छ ।
गाउँ समाजमा भएको मानसिक स्वास्थ्य समस्यालाई न्युनिकरण र व्यवस्थापन गर्न सिएमसी नेपालले छत्रेश्वरी गाउँपालिकासंगको सहकार्यमा विभिन्न काम गर्दै आएको छ । सशक्तिकरणका कार्यक्रम सञ्चालन, मानसिक बिरामीहरुको पहिचान, औषधी उपचार, कानुनी सहयोग, सचेतना कार्यक्रमहरु लगायतका महत्वपूर्ण क्षेत्रमा बिशेष काम गर्दै आएको मनोसामाजिक परामर्शकर्ता गिता पहाडीले जानकारी दिइन् ।