खोज

बुटवल, २९ चैत । जैविक विविधता तथा पर्यावरण संरक्षण गर्ने उदेश्यका साथ नेपाली सेनाको अगुवाईमा संचालन हुने सफा हिमाल अभियान २०२४ को शुभारम्भ गरिएको छ । एक समारोहका बिच नेपाली सेनाका प्रधान सेनापति महारथी प्रभुराम शर्माले जंगी अडामा ध्वजारोहण गर्दै अभियानको शुभारम्भ गरे । कार्यक्रममा प्रधानसेनापति शर्माले अभियान नेता सेनानी आदित्य कार्कीलाई अभियान झण्डा हस्तान्तरण गर्दैै पर्वतीय पर्यावरण सुरक्षा एक सार्वजनिक महत्वको विषय भएको बताए । हिमाल सफाई अभियान सरोकारवाला सबैको साझा प्रयास, समन्वय र सहकार्यबाट मात्र सफल हुने भन्दै पर्यावरण सुरक्षामा करीब ५ दशकको सक्रिय सहभागिता एवं सफा हिमाल अभियानमा विगत पाच वर्षदेखिका अनुभवहरु सुनाए । विस्तृत र ब्यवहारिक योजनाबाट सफलतापूर्वक लक्ष्य प्राप्ती हुने विश्वास ब्यक्त गर्दै उनले अभियान अन्तरगत फोहोर संकलनसंगै सचेतना र वृहत सहभागिता महत्वपूर्ण हुने बताए ।

नेपाल सरकारको राष्ट्रिय कार्यक्रम अन्तरगत नेपाली सेनाको अगुवाईमा संचालन हुने अभियान सफल बनाउन वन तथा वातावरण मन्त्रालय, खुम्बु पासाङ ल्हामु गाउपालिका, नेपाल पर्वतारोहण संघ, हिमालयन उद्धार संघ, एभरेष्ट लिङ, एभ्नी भेन्चर, एक्पेडिसन ओपरेटर एशोसियसन आदी संघसंस्थाहरुको प्राविधिक सहयोग हुने गर्दछ ।

कार्यक्रममा संस्कृति पर्यटन तथा नागरिक उडडयन मन्त्रालयका सचिव डा. दिपक काफलेले सफलताको शुभकामना दिए । हिमाल बचाउने अभियान मुल नाराका साथ सगरमाथा, ल्होत्से र नुप्त्से हिमालबाट १० टन फोहोर तथा ५ वटा मानव शव ब्यवस्थापन गर्ने लक्ष्य लिईएको छ । करीब ३ हप्ताको प्रिडिप्लोइमेन्ट तथा एक्लिमटाईजेशन तालिम सम्पन्न गरिसकेको सफाई टोली बैशाख २ गते सगरमाथा आधार शिविरतर्फ प्रस्थान गरि करीब ५० दिनको कार्ययोजना अनुसार सफाईको कार्यमा संलग्न हुनेछन । संकलित फोहोरहरुमध्ये सड्ने फोहोर स्थानिय निकायहरुलाई र नसड्ने फोहोरहर रिसाईकल गर्ने संस्थालाई ब्यवस्थापनको लागि हस्तान्तरण गरि समापन हुने छ । अभियानले विश्वब्यापी चुनौतीको रुपमा रहेको वातावरणीय प्रदुषण तथा तापमान परिवर्तनको असरलाई केही हदसम्म न्युन गर्न सहयोग पुग्ने विश्वास सेनाले लिएको छ ।