खोज

बुटवल, १७ चैत । रुपन्देहीको कला र संगित क्षेत्रमा युवा प्रतिभा उत्पादन गर्दै आएको बागेश्वरी कला तथा संगीत एकेडेमी २५ वर्षमा प्रवेश गरेको छ । रजत जयन्तीको अवसरमा वैशाख ८ गते विविध सांस्कृतिक र स्रष्टा सम्मान कार्यक्रम गरि मनाउने भएको हो । शुक्रबार पत्रकार सम्मेलन गरि सञ्चालक लालिमा श्रेष्ठले रजत जयन्तीको तयारी भब्य रुपमा भैरहेको बताईन । चर्चित बाँसुरी वादक नगेन्द्र विक्रम राई, युवा तबला वादक निमेश कपालीको विशेष प्रस्तुति, भरत नाट्यमका कलाकार युवराज गुरुङको शास्त्रीय नृत्य, विशाल भट्टराईको ध्रुपद गायनको प्रस्तुति तथा पण्डित डा. शरदमणि त्रिपादी लगायतको प्रस्तुति रहने उनले बताईन ।

यसैगरि एकेडेमीका विद्यार्थी र प्रशिक्षकहरुबाट समेत प्रस्तुति रहने उनले बताईन । वागेश्वरीका विद्यार्थीहरूले राष्ट्रिय र अन्तर्राष्ट्रिय रूपमै नेपाललाई कला र संगित क्षेत्रबाट चिनाउन सफल भएको दाबी गरिन । कुनै बेला गीत गाउने र नाच्ने रहर भएकाहरु लुकेर सिक्नुपर्ने बाध्यता वर्तमान समयमा परिवर्तन भएको उनले बताईन । अहिले सबै उमेरका कला र नृत्यमा रमाउने गरेको उनले बताईन । हाल प्रयाग संगीत समिति इलाहवादको परीक्षा प्रणाली रहेकोमा अब छिट्टै नेपालको शास्त्रीय संगीत परीक्षा प्रणालीमा जाने योजना रहेको सञ्चालक श्रेष्ठले बताइन् ।

एकेडेमीका व्यवस्थापक दावा शेर्पा (दर्पण) ले मनोरन्जनमात्र दिने नभई मानिसहरुलाई तनाव कम गर्न समेत संगित महत्वपूर्ण हुने बताए । एकेडेमीमा गायन, नृत्य, बाध्यवादन र चित्रकला विषयमा कक्षाहरू सञ्चालन गरिरहेको उनले बताए । एकेडेमीले बुटवलमा मात्रै नभएर तिलोत्तमा ५ मणिग्राममा पनि विगत ४ वर्षदेखि सेवा दिइरहेको छ । हाल एकेडेमीको बुटवल र मणिग्राम शाखाका विभिन्न विधामा १५० जना विद्यार्थीहरू रहेका छन् भने कर्मचारी र प्रशिक्षक १५ जना छन् ।