खोज

सुनवल, १४ चैत्र । संघिय सरकारका भुमि व्यवस्था सहकारी तथा गरिवि निवारण मन्त्री बलराम अधिकारीले दुई वर्ष भित्र भुमि सम्बन्धि समस्या समाधान गर्ने बताएका छन् । बुधवार पश्चिम नवलपरासीको सुस्तामा भुमिहिन तथा अव्यवस्थीत बसोबासीका समस्याका बारेमा आयोजित अन्तरक्रिया कार्यक्रममा मन्त्री अधिकारीले लामो समयसम्म जमिन जोतभोग गर्दे आएपनि लालपुर्जाविहिन भएर बस्नुपर्ने अवस्थाको अन्त्य गर्ने बताए । सुनवल, रामग्राम, सरावल, प्रतापपुर र सुस्ताका भुमिहिन सुकुम्बासिका समस्या सुनेपछि मन्त्री अधिकारीले चैत्र भित्रै नयाँ आयोग बन्ने र वैशाखबाट कामले गती लिने विश्वास व्यक्त गरे । जग्गा प्राप्त गर्नकै लागी सुकुम्बासी बन्ने प्रवृत्ति देखिएको भन्दै मन्त्री अधिकारीले त्यस्तो समस्या समाधान गर्न नीति नै परिर्वतन गर्न लागिएको पनि जानकारी दिए ।

मन्त्री अधिकारीले बुधवार नवलपरासीको सिमावर्ती क्षेत्रमा हुने डुबान र कटानको समस्या बारे पनि स्थलगत अवलोकन गरि जानकारी लिएका छन् । खेतियोग्य भुमि डुबानमा पर्दे आएकाले अन्तर–मन्त्रालय समन्वय गरेर समस्या समाधान गर्न पहल गर्ने उनले प्रतिवद्धता व्यक्त गरे । ‘हामीले मात्रै चाहेर हुदैन् परराष्ट्र र उर्जा जलस्रोत तथा सिचाँईसंग पनि समन्वय गरेर काम गर्नुपर्छ, मन्त्री अधिकारीले भने ।’

यस्तै मन्त्री अधिकारीले वर्तमान सरकारले पुरा अवधि काम गर्ने बताउदै यहि सरकारले परिणाम दिने दाबी गरे । सरकार नबन्दै विभिन्न टिकाटिप्पणी हुने गरेको भन्दै अधिकारीले नकारात्मक भाष्य चिरेर वर्तमान सत्ता गठबन्धनले मुलुकलाई निकास दिने पनि बताए ।