खोज

बुटवल , १४ चैत– पश्चिम नेपाल बस व्यवसायी प्रा.लि. को आशन्न निर्वाचनमा दधिराम खरेलको नेतृत्वमा संयुक्त व्यवसायी प्यानल घोषणा गरिएको छ । यहि चैत १६ र १७ गते हुने अधिवेशनको लागि अध्यक्षमा तेस्रो पटक पुनः खरेल प्यानलले चुनावी घोषणा गरेको हो ।
प्रा.लि.को दोस्रो अधिबेशनमा ‘जसको नीति उसको नेतृत्व’ भन्ने नारा सहित खरेलको नेतृत्वमा सक्षम, दुरदर्शी, अनुभवी संयुक्त व्यवसायीहरूको प्यानल घोषणा गरिएको हो ।

बुटवलमा एक कार्यक्रमको आयोजना गरी घोषणा गरिएको संयुक्त प्यानलबाट हालका अध्यक्ष दधिराम खरेललाई प्रा.लि.को अध्यक्षमा अघि सारिएको छ । त्यस्तै प्रा.लि.को सञ्चालक समितिमा रामचन्द्र खड्का, जितेन्द्र खत्री, नारायण भण्डारी, नारायणप्रसाद घिमिरे, गोपालबहादुर पौडेल, चेतनारायण बेलवासे (गोली नारान), रामचन्द्र भुसाल, सुरेन्द्र श्रेष्ठ, मोहन पि.एस., जिवनकुमार बन्जाडेको उम्मेदवारी सार्वजनिक गरेको छ ।

प्यानल घोषणा कार्यक्रममा बोल्दै अध्यक्षका उम्मेदवार दधिराम खरेलले प्रा.लि.लाई अझ सक्षम र सुदृढ बनाउंन आफ्नो उम्मेदवारी रहेको बताए । समितिबाट कम्पनी जाँदा धेरै ठुलो आर्थिक भार परेको अवस्थामा त्यसलाई समाधान गरेर कम्पनीलाई सक्षम बनाएको बताए । दुर्घटना न्यूनीकरण, सवारी साधनको विमा पोलिसलाई अझ चुस्त बनाउन आफ्नो नेतृत्वको टिमले काम गर्ने सो अवसरमा उनले प्रतिबद्धता जनाए ।
उनले कम्पनीलाई गतिशिल बनाउंदै व्यवसायिकको पक्षमा काम गर्न समितिकै सदस्यहरूले दिएको जिम्मेवारी पूरा गर्न अध्यक्षमा पुनः उम्मेदवारी दिएको बताए । कम्पनी सफल हुनुमा नेतृत्वकर्ताको मात्र भूमिका नहुने उल्लेख गर्दै खरेलले स्प्रीडमा काम गर्ने सक्षम नेतृत्व टिम आफु संग रहेको बताए । व्यवसाय सञ्चालन नगर्ने तर नेतृत्वमा आउन खोज्नेहरूबाट कम्पनीले उल्लेख्य सफलता हात नपर्ने भन्दै खरेलले आफ्नो टिम व्यवसायीहरूको मात्र टिम रहेको बताए ।

संयुक्त प्यानलका चुनाव प्रचार प्रसार समितिका संयोजक कृष्णप्रसाद सापकोटाले जुझारु र युवा नेतृत्वको टिमलाई कम्पनीलाई गतिशिल बनाउँदै व्यवसायीको पक्षमा काम गर्ने बताए । २ दिन सम्म चल्ने अधिबेशनमा कम्पनीमा आबद्ध २ हजार २ सदस्यले मतदान गर्नेछन् ।

गाहाले पनि गरे घोषणा

उता अर्को समूहले पनि उमेद्बारी घोषणा गरेको छ । बुटवल उपमहानगरपालिका वडा नम्बर ७ अध्यक्ष पदमराज गाहको नेतृत्वमा समावेशी प्यानल घोषणा गरिएको हो । गाहाको प्यानलमा कृष्ण प्रसाद पाण्डे, रमेश प्रसाद अधिकारी, महेश कुमार कोईराला, मोति कुमार उपाध्याय(पौडेल), कुश्माखर रेग्मी, प्रेम गौचन, मञ्जु कुमारी गाह, ऋषिराम पाठक, नारायण अधिकारी र राजेश लामा रहेका छन् ।

घोषणा सभामा बोल्दै गाहले संघको गरिमा कायम राख्दै ब्यबसायीक हक अधिकारको लागि आफू नेतृत्वको प्यानललाई बिजयी बनाउन आग्रह गरे ।

कार्यक्रममा बोल्दै नेपाली काङ्ग्रेस लुम्बिनी प्रदेश महामन्त्री बिक्रम खनालले यो प्यानल समावेशी रहेको बताउँदै जिताउन प्रतिबद्धता ब्यक्त गर्न आग्रह गरे ।

कार्यक्रममा नेपाली काङ्ग्रेस लुम्बिनी प्रदेश कोषाध्यक्ष प्रकाश राना, प्रदेश सदस्य राम बहादुर कार्की, नेकपा एसका नेता चीन बहादुर गुरुङ, बुटवल उपमहानगरपालिका प्रमुख खेलराज पाण्डेय, काङ्ग्रेस रूपन्देही क्षेत्र नम्बर २ सभापति प्रजापल गिरि, ब्यवसायी फर्शुराम ढकाल, मुक्तिराम खरेल, ज्योति भण्डारी लगायतले बोलेका थिए ।