खोज

बुटवल,२८ फागुन ।  सत्ता समीकरण फेरिएसंगै कांग्रेसले समर्थन फिर्ता लिएपछि बागमतिमा माओवादी केन्द्रका शालिकराम जमकट्टेल मुख्यमन्त्री रहेको प्रदेश सरकार अल्पमतमा परेको छ । बागमतिमा एमाले र नेकपा एकीकृत समाजवादीको समर्थनले मात्र बहुमत पुग्ने अवस्था छैन । त्यहां नयां सत्ता गठबन्धनमा रहेको रास्वपा र जसपाको उपस्थिति छैन । कुल ११० सदस्यीय प्रदेशसभामा सत्ता गठबन्धन दल एमाले २७, माओवादी २१, नेकपा एकीकृत समाजवादीसँग ७ सिट छ ।
बहुमतका लागि ५६ सिट आवश्यक हुनेमा सत्ता गठबन्धनसँग ५५ सिट मात्र छ । सत्ता गठबन्धनबाहिर रहेको कांग्रेससँग ३७ र राप्रपासँग १३ सिट छ ।
नेपाल मजदुर किसान पार्टीको ३ सिट छ भने हाम्रो नेपाली पार्टीसँग २ सिट छ । दुवैतर्फ ५५ सिट देखिएपछि सरकार गठन गर्न सत्ता गठबन्धनलाई चुनौति देखिएको छ । लौरो चुनाव चिन्हमार्फत पहिलोपटक चुनावमा भाग लिएर २ सिट जितेको हाम्रो नेपाली पार्टीले अहिलेका मुख्यमन्त्री शालिकराम जमकट्टेललाई समर्थन नगर्ने घोषणा गरेपछि नयां गठबन्धनलाई टाउको दुखाई भएको छ । नेमकिपाले पनि समर्थन गर्ने अवस्था छैन ।
हाम्रो नेपाली पार्टीका अध्यक्ष इन्जिनियर अनन्तराज घिमिरेले मुख्यमन्त्री जमकट्टेलले जनअपेक्षा अनुसार काम गर्न नसकेको हुंदा समर्थन गर्न नसकिने बताए ।