खोज

काठमाडौं, २५ साउन। 

बागमती प्रदेशका मुख्यमन्त्री इन्द्रबहादुर बानियाँलाई विश्वासको मत दिन सत्ता साझेदार दल नेकपा एमालेले समेत ह्वीप जारी गरेको छ।

नेकपा एमाले बागमती प्रदेश संसदीय दलले साउन २७ गते मंगलबार दिउँसो ४ बजेका लागि तय गरिएको प्रदेशसभा बैठकमा अनिवार्य उपस्थित भई मुख्यमन्त्री बानियाँको पक्षमा मतदान गर्न आफ्ना सांसदहरूलाई निर्देशन दिएको हो।

यसअघि, नेपाली कांग्रेसले पनि बानियाँलाई विश्वासको मत दिन ह्वीप जारी गरिसकेको छ। ललितपुरको भैंसेपाटीस्थित मुख्यमन्त्री निवासमा शनिबार बसेको कांग्रेस संसदीय दलको बैठकले तीन बुँदे ह्वीप जारी गर्दै सबै सांसदहरूलाई बैठकमा अनिवार्य उपस्थित भई तटस्थ नबस्ने र विश्वासको मतको पक्षमा मतदान गर्न निर्देशन दिएको हो।

नेकपा एमालेले साउन २७ गते दिउँसो १ बजे आफ्ना सांसदहरूको संसदीय दलको बैठकसमेत बोलाएको छ।

गत साउन २० गते मुख्यमन्त्रीमा नियुक्त भएका इन्द्रबहादुर बानियाँले नेपालको संविधानको धारा १६८ को उपधारा (४) तथा प्रदेशसभा नियमावली, २०७४ को नियम १४३ को उपनियम (१) अनुसार विश्वासको मत लिन लागेका हुन्।

विश्वासको मतको लागि आवश्यक तयारी पूरा भएको जनाउँदै सत्ता गठबन्धन दलहरूले आफ्ना सांसदहरूलाई ह्वीपमार्फत साथ दिन आग्रह गरेका छन्।