खोज

बुटवल, २८ फागुन । मोफसलमा हुने फुटबल प्रतियोगितामध्येमा पुरानोमध्येको एक हो, तिलोत्तमा गोल्ड कप । अखिल नेपाल फुटबल संघ (एन्फा) को क्यालेन्डरमा परेको यो गोल्ड कप बुटवल उपमहानगरपालिका र जिल्ला फुटबल संघको प्रतिष्ठानको विषयमा पर्ने खेलकुदमा पर्दछ । तत्कालीन बुटवल नगर पञ्चायतले २०३१ सालमा स्थापना गरेर २०३३ सालदेखि प्रतियोगिता सुरुवात भएको थियो । बुटवल उपमहानगरपालिकाको संरक्षकत्वमा रहेको यो प्रतियोगिता जिल्ला फुटबल संघले सञ्चालन गर्दै आएको छ । खेल क्षेत्रमा आर्थिक भाईब्रेट ल्याउन सक्ने सम्भावनाको रूपमा लिईरहेको बेला २३ आंै संस्करणको गोल्डकप भने नहुने पक्कापक्की भएको छ । यसअघि कोभिड संक्रमणकै कारण ३ वर्ष रोकिएको थियो ।

रूपन्देही जिल्ला फुटबल संघका अध्यक्ष लोक पुनले करिब १ करोड रूपैयाँ खर्च हुने प्रतियोगिताको लागि स्थायी श्रोत मुख्य बाधक भएको बताए । बुटवल उपमहानगरपालिकाबाट गतवर्ष ३५ लाख रूपैयाँ बिनियोजित गरेकोमा यो वर्ष १० लाख रूपैयाँमात्र राखिँदा प्रतियोगिता संचालनमा केही समस्या आउने अवस्था देखिएको उनले बताए । अर्कोतर्फ धेरै प्रतियोगिताहरू संचालन भएको देविनगरको खेलमैदान स्तरोन्नती गर्नुपर्ने बाध्यता रहेको उनले बताए । ‘मैदानकै कारण रोक्न बाध्य भएका छौ,’—उनले भने । खेल मैदानको स्तरोन्नती गर्नेतर्फ आफूहरू केन्द्रित भएको उनले बताए । माटो राखेर लेभल बढाउनुपर्ने अवस्था रहेको भन्दै यसका लागि स्थानीय सरकारसँग माग गरेको उनले बताए । ‘पहल थालेका छौं,’—उनले भने । मैदान बनाउन कै लागि माटो मात्र १५ लाख रूपैयाँको लाग्ने प्रारम्भिक अनुमान गरेको भन्दै अघिल्लो वर्ष मैदानमा पाईपलाईन बिस्तार गरिएको उनले बताए । एउटै मैदानमा प्रतियोगिता र अभ्यास खेल गराउँदा पनि छिटो खराब हुने समस्या आईपरेको उनको दाबी छ । ‘अभ्यास मैदान नहुँदा समस्या रहेको छ,’—उनले भने । यो वर्ष ग्याब गरेर अर्कोवर्ष भब्य रूपमा गर्ने उनले बताए ।
यता रूपन्देहीका खेलप्रेमीहरू भने आर्थिक र मैदानको कारण देखाउने बाहाना मात्रै भएको दाबी गर्छन । यो प्रतियोगितालाई जसरी भएपनि निरन्तरता दिनुपर्ने उनीहरू बताउँछन ।

मैदान बनाउने कुरा खासै समस्या नभएको भन्दै यसअघि पनि धेरै पटक मैदान मर्मत गरिएको उनीहरूको दाबी छ । संघको नेतृत्व लिएर मुख्य ३ काममध्ये कुनै पनि हुन नसकेको उनीहरू बताउँछन । तिलोत्तमा गोल्डकप, जिल्ला लिग र एकेडेमी मुख्य काम भएपनि यसतर्फ संघको ध्यान गएको देखिँदैन । रूपन्देही फुटबल संघका पदाधिकारीहरू आफ्नो दायित्वबाट उम्किन बाहानाबाजी गरेको उनीहरूको दाबी छ । बुटवल उपमहानगरपालिकाले आयोजकको बिकल्प खोज्नुपर्ने अवस्था आएको खेलप्रेमीहरू बताउँछन ।

यता बुटवल उपमहानगरपालिका खेलकुद विकास समितिका संयोजक बोनिन पियाले भने रूपन्देही जिल्ला फुटबल संघ प्रतियोगिता आयोजना गर्न नसक्ने जानकारी गराएको बताउँछन । समय अभाव र खेलमैदानको गुणस्तर खस्किएको हुँदा गर्न कठिनाई भएको संघबाट मौखिक जानकारी पाएको उनले बताए । रूपन्देहीकै गौरबको रूपमा हेरिने प्रतियोगिता रोक्न नहुने पक्षमा आफूहरू रहेको उनले बताए ।

गोल्डकप विजेताको ईतिहास

२०३३ सालमा भएको पहिलो खेलमा सिद्धार्थ खेलकुद परिषद् रूपन्देही विजयी भएको थियो भने दोस्रो संस्करणमा बम्बई फर्टिलाईजर मुम्बई भएको थियो । तेस्रो, नवौं, दशौं र तेह्रौमा महेन्द्र पुलिस क्लब विजयी भयो । चौथो, पाँचौ र छैठौंमा कालिका स्पोर्टिङ क्लबले उपाधि चुमेको थियो । सातौं संस्करण भने जनकपुर चुरोट कारखानाले उपाधि हात पारेको थिए । त्यस्तै, आठौमा आरएनएसी, एघारौंमा महिन्द्रा एण्ड महिन्द्रा मुम्बई, बाह्रौं र सोह्रौमा त्रिभुवन आर्मी क्लब, चौधौं र अठारौंमा रूपन्देही ११, पन्ध्रौमा फ्रेन्ड्स क्लब, सत्रौमा जावलाखेल युथ क्लब र १९ औं संस्करणको उपाधि सिएमसी संकटा क्लवले जितेका थिए । २० औं थ्रिस्टार क्लव काठमाडौं, २१ औं संस्करणको उपाधि क्यामरुनको दाउफिन्स क्लब र २२ औ संस्करण भने मनाङ मस्याङ्दी क्लबले चुमेको थियो ।