खोज

बुटवल, २६ माघ । स्कलर्स होम स्कुल बुटवलमा शुक्रबार कार्निबल कार्यक्रम भएको छ । बिद्यार्थीहरुमा अन्तरनिहित प्रतिभा प्रस्फुटन गर्ने उदेश्यका साथ हजुरबुबा/हजुरआमा सम्मान, सास्कृतिक पोसाक प्रतियोगिता, खाना महोत्सव, पुस्तक प्रर्दशनी र फेस आर्ट लगायत कार्यक्रम गरिएको हो । कक्षा पिजि देखि युकेजीसम्मका बिद्यार्थीका हजुरबुबा र आमा गरि एक सय जनालाई ढाका टोपी र खादाले सम्मान गरिदा निक्कै खुशीयालीको वातावरण बनेको थियो ।

अनुशासन, मानवता र ज्ञानलाई आत्मसात् गर्दै बिगत ३२ बर्ष अघि स्थापना भएको विद्यालय संस्कारसहितको व्यावहारिक शिक्षालाइ जोड दिदै आएको विद्यालयका प्राचार्य बाबुराम बन्जाडेले बताए । विद्यार्थीहरू विभिन्न विधामा अबल र क्षमतावान हुनुपर्छ भन्ने मान्यताका साथ बटुक, सेलरोटी, मम, छोइला, पकौडा, चुकाउने लगायत नेपाली खानाका परिकारहरू प्रदर्शन गरी करिब एक हजार जनालाई बिद्यार्थीहरुले स्वाद चखाइएका थिए । प्राचार्य बाबुराम बञ्जाडेले विद्यार्थीमा अद्भुत क्षमता हुने र त्यो क्षमता पहिचान गरि फरक ढङ्गले प्रस्तुतिको अवसर सृजना गर्ने गरि कार्यक्रमलाई जोड दिदै आएको बताए ।

कार्यक्रममा विद्यालयका उपप्राचार्य टिकाराम गौतमले विद्यार्थीहरुलाई पढाईसंगै आयआर्जन र ब्यवहारिक शिक्षामा जोड्ने गरि कार्यक्रम गरिएको बताए । यसैगरि पठन संस्कृतिको विकासका लागि बुक प्रदर्शनी र फेस आर्ट लगायतका रमाइला कार्यक्रमहरु गरिएको उनले बताए ।