खोज

सुनवल, २३ माघ ।

नेपाली काङ्ग्रे्रसका महामन्त्री गगन थापाले गठबन्धन सरकारले अपेक्षित काम गर्न नसकेको बताएका छन् । मेची–महाकाली संवाद यात्राका क्रममा मंगलबार बिहान पश्चिम नवलपरासीको बर्दघाटमा संञ्चारकर्मीसंग कुराकानी गर्दे महामन्त्री थापाले गठबन्धन सरकारले जनअपेक्षा अनुरुपको काम गर्न नसकेको टिप्पणी गरे । “सरकारले जसरी डेलिभरी दिनुपर्दथ्यो त्यो हुन सकेन”– थापाले भने ।

चुनावमा भएको गठबन्धनका कारण पार्टी कार्यकर्ता र आम जनतामा समेत अझै निराशा कायमै रहेको बताउँदै उनले चुनावको मुखमा गठबन्धन गर्ने परिपाटी बदल्नुपर्नेमा जोड दिए । चुनावका बेला गरेको गठबन्धनले चुनाव जितेको ठाँउमा पनि निराशा रहेको बताउँदै उनले पार्टी नेतृत्व यस विषयमा गम्भीर बन्नुपर्ने बताए ।

संवाद यात्राका क्रममा आम नागरिकहरूले भोग्दै आएका धेरै समस्याका विषयमा छलफल भएको बताउदै प्रतिनिधि सभा सदस्य समेत रहेका थापाले भौतिक पूर्वाधारका काममा हुने ढिलाईले जनतालाई धेरै असर पारेको बताए । १०÷१२ वर्ष सम्म पनि काम पुरा नहुने समस्याका कारण जनता निराश भएको पाइएको उनले बताए ।

नेपाली काङ्ग्रे्रसका केन्द्रीय सदस्य पुर्व मन्त्री केशव कुमार बुढाथोकीको निधन भएपछि सम्बाद यात्रा अन्तर्गतको बाकी यात्रा अहिलेलाई स्थगित गरिएको छ ।