खोज

गुल्मी, १६ माघ

गुल्मीको सदरमुकाम तम्घासमा नियम विपरित सञ्चालन गरिएको सम्पन्न आयुर्वेद पसलमा सिल गरिएको छ । नियम विपरित औषधि पसल सञ्चालन गरिरहेको भन्ने गोप्य सूचनाको आधारमा जिल्ला प्रशासन कार्यालय गुल्मीले आज सम्पन्न आयुर्वेद औषधि पसलमा शिल गरेको हो ।

जिल्ला प्रशासन कार्यालयका प्रशासकीय अधिकृत नारायण घर्तीको नेतृत्वमा गएको टोलीले उक्त औषधि पसलको अनुगमन गर्ने क्रममा नियम बिपरित पसल सञ्चालन गरेको प्रमाण भेटिएपछि पसलमा शिल गरिएको हो । बिगत केही बर्षदेखि जिल्लाको सदरमुकाम तम्घास बजारमा सम्म्पन्न आयुर्वेद नामबाट उक्त पसल सञ्चालनमा आइरहेको थियो ।

आयुर्वेद औषधि पसलले नियम विपरीत प्रयोगशाला सेवा सञ्चालन गरी औषधि बिक्री गरिरहेको भन्ने सूचनाको आधारमा प्रशासनले गरेको अनुगमनको क्रममा मापदण्ड विपरित पसल सञ्चालनमा आएको पाइएपछि आयुर्वेद पसल शिल गरी अनुसन्धान शुरु गरिएको प्रमुख जिल्ला अधिकारी कृष्ण प्रसाद शर्माले जानकारी दिए ।

प्रशासकीय अधिकृत घर्तीका अनुसार सम्पन्न आयुर्वेद पसलले सञ्चालन गरेको प्रयोगशाला सम्बन्धित निकायमा दर्ता नगरेको, एलोपेथीक र होमोपेथीक दुवै औषधि बिक्री गर्दै आएको, औषधिको खुल्ला बिक्री एवं बिरामीको चेकजाँच गरेको भेटिएको बताईएको छ । उक्त पसल सफल होमियो फार्मेसी र सम्पन्न आयुर्वेद औषधालयको नामबाट एकै ठाउँबाट सञ्चालन हुँदै आएको छ ।