खोज

रोल्पा, १६ माघ । रोल्पा नगरपालिकाले लोकसेवा आयोग र शिक्षक सेवा आयोगको तयारी कक्षा संचालन गरेको छ । लोक सेवा आयोग र शिक्षक सेवा आयोगको तयारी गर्ने चाहना नगरबासीहरूलाई लक्षित गरि उक्त कक्षा संचालन गरेको हो ।

नासु र खरिदारको तयारी कक्षामा सहभागी हुन १४२ वटा आवेदन परेको रोल्पा नगरपालिकाले जानकारी दिएको छ । त्यसरी प्राप्त आवेदन मध्ये प्रवेश परीक्षाको आधारमा ८० जना छनौट भएका थिए । यसैगरि शिक्षक सेवा आयोग तर्फ ३२ जनाले आवेदन दिएका थिए । शिक्षक सेवा आयोग तयारी कक्षा लिन आवेदन दिएका मध्ये सवै तयारी कक्षामा सहभागी भएको रोल्पा नगरपालिकाका प्रशासकीय अधिकृत सुदीप डाँगीको भनाइ छ । सव ईन्जिनियर तर्फ ६ वटा मात्रै आवेदन परेकोमा २ वटा आवेदन नगरपालिका बाहिरको रहेकाले ४ जनाको लागि मात्रै कक्षा चलाउन सम्भव भएन डाँगीले भने ।

तीन महिना सम्म संचालन हुने उक्त तयारी कक्षाका लागी नगरपालिकामा कार्यरत कर्मचारी, जिल्लाका विभिन्न कार्यालयमा कार्यरत कर्मचारी र आवश्यकता अनुसार जिल्ला बाहिरवाट समेत प्रशिक्षक झिकाएर फुल प्याकेजमा कक्षा संचालन गर्छौ निमित्त प्रमुख प्रशासकीय अधिकृत पराजुलीले भने ।

अघिल्ला वर्ष शिक्षक सेवा आयोगको तयारी कक्षा संचालन गरेको वताउँदै सो कक्षामा सहभागी मध्ये ९ जनाले शिक्षक सेवा आयोग पास गरि जिल्लाका विभिन्न विद्यालयमा सिफारिस भएको पराजुलीले जानकारी दिए । युवा युवतीलाई स्वेदशमै सम्भव छ भन्ने शिक्षा दिन जरुरी रहेको वताउदै त्यसका लागी लोकसेवा र शिक्षक सेवा आयोगका तयारी कक्षाहरू सहयोगी हुने उनको भनाई थियो।

थोरै विकास वजेट कटौती गरेर लोकसेवा र शिक्षक सेवा आयोग तयारी कक्षा सुरु गरेका छौ, रोल्पा नगरपालिकाका नगर प्रमुख सुरेन्द्र घर्तीमगर भने । भौतिक विकासको साथ साथै मानव संशाधन विकास जरुरी रहेकाले विगतमा भौतिक विकासलाई मात्र जोड दिए पनि अव विस्तारै मानव संशाधन विकासलाई जोड दिन थालेका छौ नगर प्रमुख घर्तीमगर भने । नगरपालिकालाई शैक्षिक हवको रूपमा विकास गर्न नगरपालिकाले शिक्षा क्षेत्रको विकासका लागी प्राथमिकताका साथ काम गरेको गरेको वताउदै अव मानव संशाधनको विकास नगरपालिकाको प्राथमिकतामा पर्दै जान थालेको नगरप्रमुख घर्तीमगरको भनाई थियो ।