खोज

बुटवल, १२ माघ । लुम्बिनी अटोमोबाईल्स एशोसियसन अफ नेपाल (नाडा) लुम्बिनी को तेस्रो साधारण तथा दोस्रो अधिवेशनबाट निर्वाचित कार्यसमितिको पद स्थापन भएको छ । अटोमोबाईल्स एशोसियसन अफ नेपाल (नाडा) केन्द्रका केन्द्रिय सदस्य नवराज भुषालले नवनिर्वाचित अध्यक्ष गणेश प्रसाद भट्टराईलाई पदस्थापन गराए । केन्द्रिय सदस्य भुषालले संस्थागत विकासमा जोड दिन सुझाव दिए । भौतिक पूर्वाधार सम्पन्न भएमात्र कार्यसम्पादन राम्रो हुने भन्दै ब्यक्तिगत रुपमा भवन निमार्णमा ५ लाख रुपैया सहयोग गर्ने तथा श्रोत खोजेर थप ५ लाख रुपैया जुटाउने प्रतिवद्धता जनाए ।

कार्यक्रममा नवनिर्वाचित अध्यक्ष गणेश प्रसाद भट्टराईले सबैको सहयोगमा उत्कृष्ट कार्यकाल बनाउने गरि अघि बढ्ने प्रतिवद्घता जनाए । सरकारलाई कर तिरेअनुसार नै आफ्ना अधिकारको विषयमा निरन्तर आवाज उठाउने बताए । अटो ब्यवसायीहरुको पिडामा संस्थागत सधै एकजुट हुने उनले बताए । नाडा केन्द्रमा निर्वाचित केन्द्रीय अध्यक्ष करण चौधरीको टिमलाई नाडा लुम्बिनीबाट साथसहयोग रहने नाडा लुम्बिनीका अध्यक्ष भट्टराईले बताए।

कार्यक्रममा नाडाका संस्थागत उपाध्यक्ष नरेन्द्र बहादुर वलीले सरकारबाट आवश्यक पहल गर्नुपर्ने अवस्था आएको बताए । बैक वित्तिय संस्थाहरु आफुहरु ठगिनुपरेको उनले गुनासो गरे । लोन थप्दै जाने र ब्याज बढ्ने जस्तो जटिल अवस्थाका कारण ब्यवसायमा त्रास आएको उनले बताए । अटो ब्यवसाय आर्थिक कारण आईसियुमा परेको भन्दै अब भेन्टिलेटरमा लैजाने की उपचार गरेर निको बनाउने भन्ने सरकारबाट निर्णय गर्नुपर्ने अवस्था आएको बताए । आफुहरु १४ बुदे मागपत्र सहित सरकारलाई ध्यानाकर्षण गराउने गरि छिटोभन्दा छिटो एक्सनमा लाग्नुपर्ने उनले बताए । निक्कै गम्भीर अवस्था आएको भन्दै संस्थागत पहलमा जोड दिए ।

कार्यक्रममा संस्थाका सल्लाहकार प्रेम फौदार, सल्लाहकार गोपाल पाण्डे, वरिष्ठ उपाध्यक्ष रोशन पाण्डे, उपाध्यक्ष कृष्ण भण्डारीले स्थापनाको छोटोसमयमा ब्यवसायिक हकहितसंगै सामाजिक कार्यमा उत्कृष्ट कार्य गर्न सफल भएको बताए ।

नाडाको प्रथम बैठकबाट विभिन्न निर्णय पारित
यसैबिच शुक्रबार नै बसेको नाडा लुम्बिनीको पहिलो बैठकबाट विभिन्न प्रस्तावहरु पारित गरेको छ । बैठकबाट दुई जना सदस्यहरु भुमि सापकोटा (रुपन्देही) र शेषमणि गौतम (दाङ) मनोनित गरिएको छ । यसैगरि संघको सल्लाहकारमा गोपाल पाण्डे, अधिबक्ता कृष्ण पाण्डे, प्रेम फौदार, सन्तोष पाण्डे, रबिन्सन श्रेष्ठ, नेत्र ज्ञवाली मनोनित गरेको छ ।

यसैगरि संस्थाको प्रेस सल्लाहकारमा स्वस्तिक श्रेष्ठ, कपिल ज्ञवालीलाई मनोनित गरिएको नाडाका महासचिव राम प्रसाद बेल्बासेले बताए । यसैगरि संस्थाबाट लुम्बिनी प्रदेशस्तर अटो शो आयोजना गर्नका लागि संस्थाका वरिष्ठ उपाध्यक्ष रोशन पाण्डेलाई जिम्मेवारी दिईएको छ । यसैगरि विभिन्न कार्यक्रमका संयोजकहरु समेत तोकिएको छ ।