खोज

बुटवल, २ माघ । बुटवल उपमहानगरपालिका अन्तर विद्यालय स्तरीय पाचौ राष्ट्रपति रनिङशिल्ड प्रतियोगिता २०८० माघको पहिलो साता हुने भएको छ । मंगलबार पत्रकार सम्मेलन गरि माघ ४ देखि ६ गतेसम्म हुने प्रतियोगिताको सबै तयारी अन्तिम चरणमा पुगेको नगर खेलकुद विकास समितिका संयोजक बोनिन पियाले बताए । प्रतियोगिता सञ्चालनका लागि ५७ सदस्यीय मुल समिति, खेल विधाका समिति र १० वटा अन्य विधाका समितिहरु बनाएर तिब्रता दिइएको उनले बताए । यसैगरि विद्यालयका शिक्षक, प्रशिक्षकहरुलाई प्रतियोगिताको बारेमा जानकारी दिने गरि तालिम समेत दिईएको उनले बताए । प्रतियोगितामा १८ वर्ष भन्दा मुनिका विद्यार्थीले भाग लिन पाउने र खेलाडीहरुको बीमाको समेत ब्यवस्था गरिएको उनले बताए । ‘२०६२ माघ ४ गतेभन्दा अघि जन्म दर्ता भएका खेलाडीले भाग लिन पाउदैन ।’—उनले भने । प्रतियोगितामा फिल्ड हाइजम्प, लङजम्प, त्रिपलजम्प, ज्याभलिङ थ्रो, सटपुट, रिले दौड, भलिबल, कबड्डी, तेक्वान्दोलगायतका खेल हुनेछन् । कबड्डी प्रतियोगितामा छात्र र छात्रातर्फ ७० र ६५ केजी तौल समूह खेल्न पाउने ब्यवस्था रहेको उनले बताए । प्रतियोगितामा प्रथम हुनेलाई २५ हजार, द्वितिय हुनेलाई १७ हजार पाँच सय र तृतीयलाई १० हजार रुपैयाँ पुरस्कारको समेत व्यवस्था गरिएको छ । गतवर्षभन्दा सहभागी टीम बढी रहेको उनले बताए ।

कार्यक्रममा नगर प्रमुख खेलराज पाण्डेयले स्थानिय खेलाडीहरु विद्यालयस्तर हुदै राष्ट्रिय, अन्तराष्ट्रिय स्तरमा आफनो क्षेत्रको पहिचान दिने हुदा विद्यालयस्तरको खेलकुद विकासमा जोड दिएको बताए । धेरैभन्दा धेरै प्रतियोगिता र प्रशिक्षण कार्यक्रमलाई जोड दिएको उनले बताए । उनले बुटवलले खेलकुदलाई विशेष प्राथमिकता दिएको बताउँदै छिटै नै विद्यालयस्तरबाट खेलाडी उत्पादनका लागि फुटबल प्रतियोगिता आयोजना गर्न लागेको बताए । खेलमैदान निर्माणलाई पनि विशेष जोड दिएको उनले दाबी गरे । यो प्रतियोगितामा उत्कृष्ट हुने खेलाडी जिल्ला छनौटमा भाग लिन पाउने छन ।

प्रतियोगिता माघ ४ गते बिहीबार बिहान ११ बजेदेखि बुटवल ११ देवीनगरस्थित एन्फा टेक्निकल सेन्टरको मैदानमा शुरु हुने उनले बताए । मार्चपासमा सहभागी भइ उत्कृष्ट हुने पहिलोलाई १० हजार, दोश्रो हुनेलाई ५ हजार र तेश्रो हुनेलाई २ हजार ५ सय रुपैयाँ पुरस्कारको व्यवस्था गरिएको नगर खेलकुद विकास समितिका सचिब प्रेम बस्नेतले बताए ।

यस वर्ष बुटवल नगरका ७२ विद्यालयमध्ये सामुदायिकतर्फ २१, संस्थागततर्फ २१ गरी ४२ वटा विद्यालयका ३ सय ५० विद्यार्थीले १७ विधाका ५४ खेलमा भाग लिने छन । गत वर्षको रनिङ शिल्ड प्रतियोगिताको उपाधि कालिका मानवज्ञान माविले जितेको थियो । प्रतियोगितामा नवीन औद्योगिक माध्यमिक विद्यालय दोश्रो र न्यु होराइजन माध्यमिक विद्यालय तेश्रो भएका थिए । प्रतियोगिता सञ्चालनका लागि बुटवल उपमहानगरले २० लाख र संघ सरकारको सशर्त अनुदानबापतको १ लाख गरी २१ लाख बजेट बिनियोजन गरेको छ ।

भिडियो सामग्री