खोज

बुटवल, १७ पुस । केपी ओली कप २०२४ फुटबल प्रतियोगिता फागुन ११ देखि हुने भएको छ । राष्ट्रिय युवा संघ, नेपालको आयोजनामा दोस्रो संंस्करणको प्रतियोगिता फागुन ११ देखि २० गतेसम्म हुने भएको हो । दोस्रो संस्करण आयोजना गर्न अखिल नेपाल फुटबल संघ (एन्फा) ले राष्ट्रिय युवा संघलाई फागुन ११ देखि २० गतेसम्मको मिति उपलब्ध गराएको छ ।

एन्फाले प्रतियोगितामा सहभागी हुने टिम तथा क्लबहरु एन्फा तथा जिल्ला फुटबल संघमा आधिकारिक रुपमा आबद्ध भएको हुनुपर्नेछ शर्त राखेको छ । प्रतियोगिताको खेलहरु च्यासल र फाइनल खेल भने दशरथ रंगशालमा खेलाइने आयोजकले जनाएको छ । प्रतियोगितामा सहभागिताको लागि खुल्ला आह्वान गरिने र त्यसपछि सहभागी टिमको छनोट गरिने आयोजकले जनाएको छ ।

नेपालका ए डिभिजन र विदेशी प्रतिष्ठित टिमहरुलाई प्रतियोगितामा सहभागी गराइने आयोजकको भनाइ छ । प्रतियोगिताको विजेताले नगद ११ लाख र उपविजेताले ५ लाख पाउनेछ । प्रतियोगिताको उत्कृष्ट खेलाडीले १ लाख तथा उत्कृष्ट गोलकिपर, सर्वाधिक गोलकर्ता र उदीयमान खेलाडीले ५०–५० हजार प्राप्त गर्नेछन् । यस्तै म्यान अफ दि म्याचलाई १५ हजार नगद प्रदान गरिनेछ । गत वर्ष भएको पहिलो संस्करणमा मछिन्द्र एफसीले सातदोबाटो युथ क्लबलाई सडनडेथमा हराएर उपाधि जितेको थियो ।