खोज

बुटवल, १५ पुस । भैरहवामा जारी प्रधानमन्त्री कप पुरुष एक दिने प्रदेश क्रिकेट प्रतियोगितामा रुपन्देही जिल्लाले आफनो पहिलो जित निकालेको छ । शनिबार भएको खेलमा रुपन्देहीले पाल्पामाथि ५ बिकेटको पहिलो जित निकालेको हो ।

लुम्बिनी प्रदेश क्रिकेट संघको आयोजनामा सिद्धार्थनगर क्रिकेट स्टेडियम, भैरहवामा शनिबार भएको खेलमा टस जितेर रुपन्देहीले पाल्पालाई ब्याटिङको निम्तो दियो । रुपन्देहीको शानदार बलिङको सामु पाल्पाको ब्याटिङ चल्न सकेन । पाल्पाले २६.४ ओभरमा सबै बिकेट गुमाएर १ सय २२ रनका लक्ष्य खडा गरेको थियो । पाल्पाका लागि ओपनर ब्याटसम्यान रुपेश बश्यालले १२ बलको सामना गर्दै केवल ३ रनमा आउट भए । विपिन खत्रीले सम्हालेर ब्याटिङ गर्दै ४२ बलमा ३२ रन, रुपेश बश्यालले ३० बलमा २६ तथा आशिष लोहनीले ३१ बलमा २१ रनबाहेक अन्य ब्याट्सम्यान क्रिजमा टिक्न सकेनन । रुपन्देहीका अजय चौहानले ५.४ ओभरमा १८ रन खर्चेर शानदार ५ तथा सन्तोष यादवले ५ ओभरमा २५ रन खर्चेर ३ बिकेट लिन सफल भए ।

झिनो लक्ष्य पाएका रुपन्देहीका ब्याट्सम्यानहरु २३.५ ओभरमा केवल ५ बिकेटको नोक्सानी विजयी भए । खेलमा ओपनर ब्याट्सम्यान मृनल गुरुङर अमर मिश्राले राम्रो शुरुवात गरे । मृनलले ६३ बलमा ४५ तथा अमरले ३३ बलमा ३८ रनको योगदान दिए जुन जितका लागि महत्वपूर्ण भयो । कृष्ण कार्की २८ बलमा १८ रनको नटआउट खेले । खेलमा रुपन्देहीका अजय चौहान म्यान अफ दी म्याचबाट पुरस्कृत भए । आईतबार कपिलबस्तु र नवलपरासी टिम बिच खेल हुने प्रदेश सदस्य तथा संयोजक प्रथम पराजुलीले बताए । छनौट खेल अन्तरगत सिद्धार्थनगरमा कपिलवस्तु, परासी, पाल्पा र रुपन्देही जिल्ला तथा लमहीमा बाके, बर्दिया र दाङ जिल्लाको खेल हुने छन ।